Татарстанда узган сайлауларга беренчел нәтиҗәләр ясалды

Моннан тыш, Биектау округында Татарстан Дәүләт Советы депутатын өстәмә сайлау һәм җирле үзидарә органнарына 202 депутат сайлау узды. 

Өч көн дәвам иткән тавыш бирүдә республикада 2 млн 250 мең 967 сайлаучы катнашкан. Бу — сайлаучыларның 76,7 проценты. Республика Үзәк сайлау комиссиясе рәисе Андрей Кондратьев сайлауларның гамәлдәге закон таләпләренә туры китерелеп, штатлы режимда узуын хәбәр итте.

Сайлауны оештыру эшенә 65 территориаль һәм 2742 участок сайлау комиссиясе җәлеп ителгән. Сайлау участоклары хастаханәләрдә, шифаханәләрдә һәм тикшерү изоляторларында да эшләгән. Сайлау системасында барлыгы 21,6 мең комиссия әгъзасы хезмәт куйган.

Иң күп тавыш — «Бердәм Россия» партиясенә

Беренчел нәтиҗәләр күрсәткәнчә, Федераль сайлау округы буенча «Бердәм Россия» 72,03 процент тавыштуплаган. 

КПРФ — 11,02 процент, 

"Яңа кешеләр" — 6,87 процент, 

ЛДПР — 4,52 процент. 

"Гадел Россия" партиясе 2,16 процент 

"Россия коммунистлары" — 0,7 процент; 

"Пенсионерлар партиясе" — 0,68 процент; 

"Ватан" — 0,42 процент; 

"Яшелләр" — 0,38 процент; 

"Турыдан туры демократия партиясе" — 0,33 процент тавыш җыйган. 

Бер мандатлы округларда да җиңүчеләр билгеләнде. Идел буе округында Илья Вольфсон 67,5 процент тавыш җыйган. Мәскәү округында Руслан Йосыпов — 51,77, Түбән Кама округында Олег Морозов — 69,2, Чаллы округында Әлфия Когогина — 76,74 процент тавыш алган. Әлмәт округында Марсель Шәйдуллин 64,31 процент нәтиҗә күрсәткән. 36нчы округта Марат Нуриевка 59,92 процент сайлаучы тавыш биргән.

Биектау округында Татарстан Дәүләт Советы депутаты итеп Фәрит Абдулганиев сайланган. Аның өчен 34 957 кеше, ягъни сайлаучыларның 64,9 проценты тавыш биргән.

Сайлауларда куркынычсызлыкка аерым игътибар

Бу кампаниядә сайлау участокларында куркынычсызлык чараларына аеруча зур игътибар бирелгән. Участок комиссияләре өчен экстремаль хәлләрдә эш итү алгоритмнары әзерләнгән. 

Сайлау барышын 14 759 күзәтүче күзәткән. 935 участокта видеокүзәтү чаралары урнаштырылган, калганнарында видеоязма алып барылган. Үзәк сайлау комиссиясенә сайлау көннәрендә 14 мөрәҗәгать килгән, аларның барысы да тикшерелгән. Комиссия белдерүенчә, сайлау законнарын бозу очраклары ачыкланмаган.

Сайлаулар барышында «Мобиль сайлаучы» сервисы аша 70 мең кеше тавыш бирү урынын алдан сайлаган. Өйдә тавыш бирү өчен 91 682 гариза килгән. Бу сайлаучыларның 3,1 процентын тәшкил итә.

Өч көн дәвамында сайлау процессы киберһөҗүмнәрдән дә читтә калмаган. Татарстанда сайлау системасы ресурсларына якынча мең җитди һөҗүм теркәлгән. Шул ук вакытта ГАС «Выборы» һәм сайлауны тәэмин итүче башка төп системаларның өзлексез эшләве сакланган, дип хәбәр итте Андрей Кондратьев.