Казан ярым марафоны үткәрелә

Татарстан башкаласында 10-11 октябрьләрдә Казан илкүләм ярым марафоны була. Быел ул унынчы мәртәбә оештырыла.

Илкүләм колач

— Ун ел эчендә бу проект җирле спорт вакыйгасыннан колачлы йөгерешкә әверелде. Катнашучылар саны 7 мәртәбәгә артты. Бәйге үзенең массакүләмлелеге белән генә түгел, ә югары күрсәткечләре белән дә дан тота. Нәкъ менә, Казан марафонында 2025 елда Россия рекорды куелды. Владимир Никитин 21,1 чакрым араны 1 сәгатьтән азрак вакыт эчендә узып, илебез атлетлары арасыннан беренчесе булды, — диде шәһәр Башкарма комитетының физкультура һәм спорт комитеты рәисе Линар Гарипов «эшлекле дүшәмбе» киңәшмәсендә.

Узган ел Казан ярым марафонында ир-атлар арасында Владимир Никитин — беренче, ә Нурсолтан Киңәшбәков (Кыргызстан) икенче урынны алган иде. Хатын-кызлар арасында беренче — Луиза Лега, ә икенче Алла Сидорова булды. Йөгерештә узган ел 10 мең кеше катнашты.

Һәвәскәргә дә урын бар

Оештыручылар, спортчыларның нинди дәрәҗәдәге әзерлекләренә карамастан, ярышта катнашу урыны һәм мөмкинлеге тудырган. Программа: балалар йөгерешен дә, шулай ук 3 һәм 10 чакрымга кадәр дистанцияне дә колачлый. Төп ярым марафон — 21,1 чакрым.

Линар Гарипов әйткәчә, TIMERMAN рәсми сайтында юбилей стартында катнашырга теркәлү башланган, ул 6 октябрьгә кадәр дәвам итә. 

Транспорт хәрәкәте чикләнә 

• Спорт чарасына бәйле рәвештә шәһәр үзәгендәге кайбер урамнарда транспорт хәрәкәтенә үзгәрешләр кертеләчәк. Чикләү 10 октябрьдә 4.00 сәгатьтә кертеләчәк һәм 11 октябрьдә 12.00 сәгатьтә бетереләчәк.