Ана капиталы сертификатын электрон формада алырга мөмкин

Элегрәк сертификатны алу өчен әниләр интернет аша гариза тапшыра алалар иде, яңа кагыйдәләр буенча ана капиталын электрон формада алырга да мөмкин. Моның өчен Дәүләт хезмәтләре порталы яки Пенсия фонды сайтындагы шәхси кабинетың аша гариза тапшырырга кирәк. Аннары теркәлү урыны буенча пенсия бүлегенә барып документларны тапшырырга туры киләчәк.

– Бер тапкыр документларны биргәннән соң, сертификатны алу өчен кабат пенсия бүлегенә килү мәҗбүри түгел. Электрон сертификат автомат рәвештә гариза тапшыручының шәхси кабинетына киләчәк. Сертификат белән бергә ана капиталы турында бар мәгълүмат тупланган электрон документ та биреләчәк.
Бу рәсми кәгазьләрне бастырып алырга, экраннан карап өйрәнергә дә мөмкин,– дип аңлатты Россия Пенсия фондының Татарстан бүлеге идарәчесе Эдуард Вафин.

Сүз уңаеннан, моңа кадәр ана капиталын торак шартларын яхшырту, баланың укуы өчен түләү, әни кешенең пенсиясе тупланма өлешенә күчертеп һәм инвалид сабыйга җайлашу, яраклашу өчен кирәкле товарлар сатып алу өчен дә кулланып була. Хәзер әле күптән түгел Россия Премьер министры Дмитрий Медведев имзалаган карар нигезендә ана капиталын ипотека кредитын түләүдә дә файдаланырга мөмкин, дип хәбәр итә "Интерфакс". Төгәлрәге, ана капиталы акчасын икенче яки аннан соңгы балалар туганчы яки тугач алган ипотека займнарын түләүгә тотарга рөхсәт ителәчәк.