Әбу-Дабида барган "WorldSkills Competitions-2017" эшче һөнәрләр чемпионаты тәмамланды. Безнекеләр дә җиңүләрсез калмады. Чемпионат кысаларында мәктәп укучылары арасында барган "JuniorSkills" ярышларында Чаллының 36нчы инновацияле технология лицее укучылары «көмеш медаль» яулады.
Ярышлар электромонтаж эшләре, мобиль робототехника, график дизайны кебек өч юнәлештә барды. Шунда катнашкан укучылар Владислав Хобт белән Илья Макаров Берләшкән гарәп әмирлегендә кырдан уңыш җыеп, аны аерым бер җиргә урнаштырып баручы робот ясарга тиеш иде. Владислав робототехника белән инде өч ел шөгыльләнә. Ул төбәк этабы ярышлары һәм "Робофест" бөтенроссия фестивалендә узган «Россия инженер кадрлары» призеры, "JuniorSkills" III милли чемпионаты җиңүчесе. Физика, математика фәннәре буенча олимпиадаларда катнаша. Илья исә робототехника белән 2014 елдан бирле шөгыльләнә. Ул Бөтенроссия робот техникасы олимпиадасы җиңүчесе.
"WorldSkills Competitions-2017" дөнья чемпионаты 14-19 октябрь көннәрендә узды. Ярышларда 52 компетенция буенча 76 илдән 1200 дән артык һөнәр осталары һәм 1500 белгеч катнашты. Катнашучылар һөнәрләр буенча алты өлешкә бүленеп ярыша: төзелеш, ИТ-технологияләр, сәнгать һәм дизайн, сәнәгать производствосы, хезмәт күрсәтү һәм гражданнар транспортында хезмәт күрсәтү.
Россия җыелма командасында 22 төбәктән 58 кеше бар иде, шул исәптән Татарстан Республикасыннан җиде компетенция буенча сигез кеше катнашты.
Чемпионатның ябылу тантанасында Россия һәм Казан белән таныштырдылар. Россия Федерациясенә WorldSkills флагын тапшыру тантанасы да булды.
Татарстан Президенты Рөстәм МИҢНЕХАНОВ:
- Без эшче һөнәрләренең абруен бергәләп пропагандалыйбыз. Бу бик мөһим. Россиядә эшче һөнәрләрен популярлаштыру буенча зур эш башкарыла, аларның бөтендөнья стандартларына туры килүе дә безнең өчен бик әһәмиятле. Саймон (WorldSkills International халыкара оешмасы президенты) һәм Дэвид (WorldSkills International халыкара оешмасы башкарма директоры) - безнең күптәнге дусларыбыз һәм Казанда WorldSkills чемпионатын уздыру буенча төп киңәшчеләребез дә. Россия хөкүмәте һәрвакыт безнең өчен ачык һәм оештыру мәсьәләләрен хәл иткәндә төрлечә ярдәм күрсәтә. Без дөньядагы иң югары дәрәҗәгә ирешергә тиешбез. Берләшкән гарәп әмирлекләрендә дә үрнәк алырлык нәрсәләрне күп күрдек.
Кызыклы яңалыкларны күзәтеп бару өчен Вконтактега кушылыгыз.
Комментарийлар