Исерек килеш, 16 яшьлек үсмер 20 яшьлек егетне пычак кадап үтергән

Ижевск шәһәрендә яшәүче 16 яшьлек үсмерне тиешле саклану чиген узып, кеше үтерүдә гаеплиләр. Россия Тикшерү комитетының Удмуртия буенча Тикшерү идарәсе җинаять эшен тикшереп бетергән. Бу турыда ведомство сайтында хәбәр ителә.

Тикшерү ачыклаганча, 2020 елда 3 сентябрьгә каршы төндә 16 яшьлек үсмер үз өендә исерек була. Төнге берләр тирәсендә аның янына биредә яшәүче танышлары килә. Үсмер алдагы көнне әнисе белән талашкан булган. Танышлары шушы низаг турында сөйләшергә теләгән. Үсмер исә бу кешеләр белән очрашудан качып, подвалга төшеп китә.

Шулай да төнлә килгән танышлар өйгә бәреп керә, үсмерне подвалдан алып чыгалар. Өйдән чыгып барышлый үсмер аш-су пычагын эләктереп алырга өлгерә. 

Урамда 16 яшьлек үсмер һәм 20 яшьлек егет арасында низаг була. 20 яшьлек егет моңа кадәр дә хөкем ителгән. Ул үсмергә берничә тапкыр суга, аяклары белән тибә. Үсмер качып китә башлый, тик олырак егет аны куып тота һәм туктата. Шул чакта үсмер саклану чаралары чиген узып, 20 яшьлек егетнең күкрәк читлегенә пычак кадый. Яраланган егет урында ук үлә.

Тикшерү барышында тиешле экспертизалар ясалган, шаһитларны сораштырганнар. Җинаять эшен тикшереп бетереп, гаепләү карары чыгарганнар. Үсмерне ике елга кадәр ирегеннән мәхрүм итүләре ихтимал, диелә хәбәрдә.

Чыганак: Интертат