Кагыйдәләрне өйрәнеп үс

- Быелның тугыз аенда башкаланың Киров районында 136 авариядә сигез кеше һәлак булды, 175 кеше төрле авырлык­тагы имгәнүләр алды. Балалар катнашындагы 20 фаҗигадә бер баланы югалттык, 22 малай һәм кыз имгәнде, - диде Казан шәһәренең Киров районы буенча эчке эшләр идарәсенең ЮХИДИ бүлеге җитәкчесе Рафаэль Сәгъдиев. - Баланың юл һәлакәтенә эләгүе аның үзе өчен дә, ата-анасы өчен дә тетрәндергеч вакыйга, куркуы еллар буена узмаска мөмкин.

Балалар катнашындагы аварияләрне булдырмау максатында, ЮХИДИ төрле рейдлар оештыра, мәктәпләрдә һәм балалар бакчаларында лекция-очрашулар да үткәрелә.

Чираттагы очрашу 69 нчы балалар бакчасында булды. Полиция капитаны Сәгъдиев малайларны һәм кызларны юл хәрәкәте кагыйдәләрен өйрәнеп үсәргә чакырды, бу эштә укытучы-тәрбиячеләргә зур өметләр баглавын әйтте.

- Октябрь һәм ноябрь айларында көн кыска, караңгы тиз төшә. Кар булмаганлыктан, төнге якта юлларда кеше начар күренә, бу аварияләргә җирлек тудыра, - дип, Рафаэль Сәгъдиев ата-аналарга балаларының киемнәренә яктылык кайтаручы фликерлар, боҗралар беркетергә киңәш итте. Бакчага йөрүче нәниләргә яктылык кайтаручы боҗралар бүләк итеп таратылды.

Яктылык кайтаручы продукцияне почта бүлекчәләрендә сатып алырга да була.