Казан марафонында җиңүчеләргә 100 мең сум акча һәм түбәтәй бүләк иттеләр

Безгә илнең 75 төбәгеннән, дөньяның 25 иленнән иң яхшы спортчылар килде. Йөгерүдә Казан мэры Илсур Метшин, премьер-министр урынбасары Васил Шәйхразиев, республиканың яшьләр эшләре һәм спорт министры Владимир Леонов, сәламәтлек саклау министры Адел Вафин, махсус кунак - җырчы Нюша да катнашты.

Яшьләр эшләре һәм спорт министры, башкаларга үрнәк итеп, өч һәм ун чакрым аралыкны үтте.

- Узган ел да катнашучылар саны буенча рекорд куйган идек. Быел, Конфедерация Кубогы узу сәбәпле, маршрутны бераз үзгәрттек. Нәтиҗә түгел, ә катнашу мөһим. Йөгерүдән тыш, спортчылар дөньяда бик аз санда калган Ак барска ярдәм итә, - диде Владимир Леонов.
Шулай ук марафон кысаларында инде икенче ел рәттән «Стоп ВИЧ/СПИД» чарасы уза. 19-20 май көннәрендә һәр кеше махсус пунктларда бушлай тест уза алды.

Җырчы Нюша, йөгерү -үзеңне формада тоту өчен иң яхшы чара, ди.
- Мин һәрвакыт спорт режимында. Кызганыч, старт алдыннан аз гына аягымны авырттырдым. Ләкин бүген барлык катнашучыларны да рухландырасым килде, шуңа да халык белән бергә өч чакрымга йөгердем, - диде ул.

Нюша әле Конфедерация Кубогы илчесе дә.
Сәламәтлек саклау министры да җәйне, аеруча ял көннәрен бушка уздырмаска өнди. Марафонда Адел Вафин өч чакрым аралыкны узды.
- Отпуск вакытында ун көн эчендә 154 чакрым таулар буенча йөгердем. Шуңа да бүгенге аралык җиңел бирелде. Безнең организм бик рәхмәтле. Аңа спорт кына кирәк. Йөрәк сәгать кебек эшләргә тиеш, - ди министр.

Спортчы Сергей Каменев Орел шәһәреннән «Казан марафоны»на дип махсус килгән. Бу аның өченче марафоны.
- Кайчандыр үземә, ­Россиянең өч башкаласында марафон (42,2 чакрым) йөгерәм, дигән максат куйдым. Санкт-Петербург, Мәскәүдә булдым. Әлбәттә, спорт башкаласы - Казанны да читләтеп үтә алмадым. йөгерү минем өчен сәяхәт итү чарасы. Гадәттә, барлык марафоннар да шәһәрнең иң матур, тарихи урыннары аша уза. Казан да бик матур, «тәмле» шәһәр, - ди егет.

Татар эстрадасының биюче-җырчысы Мөнир Рахмаев та марафонга килгән. Сәхнәдәге дәртле чыгышлары аңа бер әзерлексез бүген өч чакрым аралыкны узарга ярдәм иткән.

- Киләсе елга ун чакрым йөгерәм. Спорт минем өчен ят нәрсә түгел: футбол, хоккей уйныйм, тренажер залына йөрим. Мин монда үзем генә түгел, иҗатташ дусларым - Айгөл Рәхимова, Ландыш Нигъмәтҗанова, Булат Бәйрәмов, Ләйсән Гимаева да килде. Үз нәтиҗәләрем белән канәгать. 14 минутта йөгереп килдем, - ди Мөнир.

Оештыручылар сүзләренчә, «Казан марафоны»н үткәрү шәһәргә 25 миллион сумга төшкән, ләкин кергән керем бермә-бер артык. Әйтик, узган елны 90 миллион сум җыелган иде.

Марафонның абсолют җиңүчеләре дип ирләр арасында - Алексей Трошкин, хатын-кызлар арасында Татьяна Арясова танылды. 42,2 чакрым аралыкны Алексей 2 сәгать 16 минутта үтсә, Татьяна аннан бары 15 минутка гына соңлады. Җиңүчеләргә 100 мең сум акча һәм марафон символы сурәтләнгән түбәтәй бүләк иттеләр.