Казанда 13 меңнән артык укучы җәй көне лагерьларда ял итәчәк

Бу елның җәендә Казанның 13 меңнән артык укучысы 23 шәһәр читендәге лагерьда ял итәчәк. Җәйге ял сезоны 1 июньнән башлана. Лагерьларны ремонтлау, куркынычсызлыкны тәэмин итү һәм яңа сезонга әзерләнү өчен 46,8 млн сум акча тотылачак, дип хәбәр иттеләр Казан мэриясендә.  Җәй буена 23 лагерь — 12 муниципаль һәм 11 ведомство карамагындагы лагерьга 13,5 мең укучы бара алачак. 18 көнлек сменага ата-аналар кертеме муниципаль лагерь өчен 7дән 12,7 мең сумга кадәр тәшкил итәчәк. Калган сумма республика һәм муниципаль бюджетлар хисабына капланачак. Авыр тормыш хәлендә булган 969 бала өчен ял бушлай булачак.