Казанда күзәтү тәгәрмәче пәйда булырга мөмкин

Казанның Урицкий паркында 36 метр биеклектә күзәтү тәгәрмәче төзергә җыеналар. Шәхси бер инвестор башкаланың Парк һәм скверлар дирекциясенә шундый проект тәкъдим иткән.

– Иң беренче чиратта җирле халыкка мөрәҗәгать иттек, – дип белдергән дирекциянең матбугат сәркатибе Светлана Михайлова «Татар-информ»га. – Чөнки алар – паркның хуҗалары. 

Шулай итеп, халык тыңлаулары узган, җыелучыларга анкеталар таратылган. Күпчелеге әлеге күзәтү тәгәрмәчен кирәксенмәвен белдергән. Ләкин әле бу соңгы карар түгел: анкета нәтиҗәләрен дә исәпкә алып, дирекция ачык онлайн-тавыш бирү оештырырга җыена. 

Исегезгә төшерәбез, Казанда 65 һәм 55 метрлы күзәтү тәгәрмәчләре бар инде.