Полицейский укучы кызны көчләгән

Полиция хезмәткәре үзе исә, якынлык кылу ике якның ризалыгы буенча булды, дип белдергән һәм тикшерүдән качкан.

Җинаять Лениногорск районының бер авылы читендә февраль ахырында кылынган. 28 яшьлек полиция хезмәткәре Радик Бәдретдинов 16 яшьлек кызны машинага утыртып, салонда аңа карата көч кулланган.

Зыян күрүче, үзен рәнҗетүченең кайда эшләвен белмичә, хокук саклау органнарына гариза белән мөрәҗәгать иткән. Полицейскийның хезмәттәшләре саллы дәлилләр ярдәмендә көчләүченең шәхесен ачыклаганнар. Хәзерге вакытта бу эш буенча тикшерү эшләре бара.

"Әлеге хезмәткәр эчке эшләр органнары хезмәткәре абруен төшерә торган һәм гамәлдәге законнар кысаларында җәза алачак гамәл кылган өчен эштән чыгарылган", - дип хәбәр иттеләр ТР Эчке эшләр министрлыгы матбугат хезмәтендә.

Балигъ булмаган кызны көчләү турындагы җинаять эше фигуранты тикшерүдән кача алган. Хәзер аны түбәндәге ориентировка буенча эзлиләр: кара чәчле, ябык гәүдәле, буе 180-185 сантиметр, ә кыяфәткә 25-30 яшь. Ул шәһәрдән Renault Logan га качкан.

                                                                                                                                                                                                                                                  +18