Президентка Кытай белән Америка Казан арты «районы» кебек кенә

Нью-Йорк

Президент Рөстәм Миңнеханов Нью-Йорк­та БМО штаб-квартирасында «Россия Федерациясе төбәкләре: Татарстан Республикасы – тотрыклы үсеш максатлары» дигән темага чыгыш ясады. Татарстанның уңышлары – тырыш хезмәткә, яңалыкка омтылышка, элекке буыннарның бай традицияләрен саклауга нигезләнгәнлеге турында сөйләгән ул. Берләшкән Милләтләр Оешмасының (БМО) Генераль секретаре Антониу Гутерриш Татарстан Президенты Рөстәм Миңнеханов белән очрашуы вакытында, Татарстанга конфессия­ара тату яшәүнең тәҗрибәсен башка илләргә дә уртаклашырга тәкъдим иткән. Бу фикерне Россия­нең БМОдагы Вәкаләтле вәкиле Василий Небензя да хуплаган.

– Күп милләтле һәм бай тарихлы Татарстан Республикасы – Россиянең иң динамик үсеш алган төбәкләренең берсе. Татарстанда 170тән артык милләт һәм ике төп конфессия – православие белән ислам вәкилләре тату яши. Казанга килергә яратам, ул бик матур шәһәр. Аның үсеше күз алдында. Татарстан җитәкчелегенең максаты – респуб­лика халкының тормыш шартларын мөмкин кадәр яхшырту, – дигән Василий Небензя.

Болгар

Болгарда Татарстан Президенты Рөстәм Миңнеханов белән Россия Федерациясе Президенты аппараты җитәкчесенең беренче урынбасары Сергей Кириенко катнашында 8 февральдә Болгар ислам академиясенең попечительләр советы утырышы үткәрелә. Утырышка Башкортстан, Чечня, Дагыстан, Кырым, Карачай-Черкесия рес­публикаларыннан да вәкилләр килә.