Рәшит Шакирҗанов вафат. Коронавирустан соң...

Төзелеш механикасында татар телендә югары белем бирү концепциясен һәм укыту-методика комплексын әзерләгән күренекле галимнең вафаты турындагы мәгълүматны КГАСУ җитәкчелеге раслады.

Рәшит Әгълә улы Шакирҗанов татар теле белән фән теле туры килүен алга сөргән фән эшлеклесе. 1975 елдан бирле Казан дәүләт архитектура-төзелеш университетында укыта. Татар телендә укыту буенча методик кабинет җитәкчесе. Корылмаларның динамикасы, милли мәгариф һәм фәнни-техник терминология буенча гыйльми эшләр авторы. «Фән һәм тел» журналы баш мөхәррире.
«Институтта татар төркемнәре җыйган, техник сүзлекләр чыгарган зур шәхес иде. Тел темасына кагылышлы түгәрәк өстәл утырышларында ясаган чыгышлары васыять итеп укырлык», — ди әдәбият галиме Миләүшә Хабетдинова аның белән бергә утырышларда катнашуын искә алып.

Рәшит Шакирҗанов 1949 елның 7 июнендә туган. 150дән артык фәнни, методик һәм популяр мәкалә авторы, Каюм Насыйри исемендәге премия лауреаты.

Чыганак: Татар-информ