#Кыскача яңалыклар 01 июня 2017, 09:42

Шәймиев улы «Рубин»ны җитәкли

01 июня 2017, 09:42

Казанның «Рубин» футбол клубының яңа президенты итеп Радик Шәймиев сайланды. Казан мэры Илсур Метшин исә клуб президенты вазифасын калдырды. Хәзер идарә һәм финанс мәсьәләләре тулысынча «ТАИФ» компанияләре карамагына күчәчәк.

Скопировать ссылку

52 яшьлек Радик Шәймиев - Татарстан Республикасы Дәүләт Киңәшчесе Минтимер Шәймиевның кече улы. Үз тирәсендә Шәймиев улын көчле куллы, акыллы, катгый эшмәкәр буларак беләләр. Спортка да чит кеше түгел ул. Радик Шәймиев безгә оста көрәшче, автоузышчы буларак та таныш. Тикмәгә генә Чехиядәге бер автостраданың борылышын "Шәймиевлар борылышы" димиләр инде.

Аның эшмәкәр карашы «Рубин»ның финанс мәсьәләсен дә хәл итәр дип фаразлыйлар. Узган ел команда ун яңа уенчы алу өчен генә дә 40 миллион евро акча туздырган иде. Бу данлыклы "Реал" клубының чыгымнарын да узырып киткән. Ләкин Россия чемпионатында 9 урын алып «Рубин» өметне дә, чыгымнарны да акламады. Хәзер клубка тренер эзлиләр. Кайбер фаразлар буенча «Рубин»ны янәдән Корбан Бердыев җитәклиячәк.
Врезка: Англиянең «Манчестер Юнайтед» футбол клубы дөньяның иң бай клубы булып танылган. KPMG аудиторлык оешмасы аның бәясен 3,186 миллиард евро дип исәпләп чыгарган.