Ветеран таныклыклары пластик карта рәвешендә биреләчәк

Хәрби хәрәкәтләрдә катнашучыларга сугыш хәрәкәтләре ветераннарының электрон таныклыклары биреләчәк. Алар гадәти пластик карталар кебек булачак.

Мондый карар Россия Оборона министры Сергей Шойгу Указы белән кабул ителә, ул аны Россия Оборона министрлыгы коллегиясе утырышында хәбәр итте.

Шуңа бәйле рәвештә, Россиянең барлык субъектларының хәрби комиссарларына запаста булучыларга бу таныклык нинди булачак һәм аны ничек алырга икәнен аңлатырга кушылган.

Махсус хәрби операция ветераннарына бирелгән барлык ташламалар документның кәгазь версиясен һәм электрон таныклыкны күрсәтү буенча да гамәлдә булачак.

Барлык электрон таныклыкларны ПСБ банкына гариза биреп алырга мөмкин булачак.

Пластик карта рәвешендә бирелгән таныклык кәгазь документка өстәмә булачак һәм төбәктәге социаль карта, банк картасы һәм ветеран статусын һәм закон буенча тиешле социаль ташламалар алу хокукын раслаучы документ мөмкинлекләрен берләштерергә мөмкинлек бирәчәк. Алар – милеккә салым ташламалары, коммуналь хезмәткә түләү чыгымнарын 50 процент күләмендә компенсацияләү, шәһәр яны тимер юл транспортында, шулай ук дәвалану урынына барганда һәм кайтканда шәһәрара транспортта бушлай йөрү. Моннан тыш, «сугыш хәрәкәтләре ветераны» статусы булган гражданнарга ай саен түләү каралган.