Ятим балалар фатирлы булды

Әлеге чара Татарстан Республикасының "Ятимнәрне һәм әти-әнисез калган балаларны торак белән тәэмин итү программасы" нигезендә башкарылды. Әйтергә кирәк, Татарстан Россиядә ятим балаларга өр-яңа йотлардан фатир бирүче бердәнбер төбәк.

Үз куышы булуын аларга биш ел буе көтәргә туры килгән. 40 квадрат метрлы уңайлы фатирларны хәзер җиһазлыйсы гына бар.

- Фатир миңа бик ошады. Хәзер әз-әзләп йорт кирәк-яраклары сатып алырга уйлыйм. Үзем Казанда эшли идем. Хәзер Түбән Камага күченәчәкмен. Эш эзләргә кирәк. Ләкин мин бу вакыйгага чиксез шат, - диде яңа фатир хуҗасы Никита Руппа.

Елена Ишметьева гаиләсе дә Городовище авылыннан калага күченергә җыена.
- Фатирны нәкъ менә Түбән Камадан бирүләренә шатланабыз. Хәзер кызыбызга уңайлы булсын өчен фатирны җиһазларга кирәк, - диде яшь ана.
Татарстанның Мәгариф министры урынбасары Лариса Сулима белдергәнчә, әлеге программа бездә инде унынчы ел тормышка ашырыла.

Шушы вакыт эчендә 1947 бала яңа фатирлы булды. Ятимнәрне торак белән тәэмин итү өчен дәүләт казнасыннан ике миллиард сум акча бүлеп бирелде. Программа Татарстан Президенты Рөстәм Миңнехановның шәхси күзәтүе астында башкарыла. Балалар торакны прописка буенча гына түгел, ә теләгән шәһәреннән алырга мөмкин. Бүген монда Чаллы, Зәй, Әлмәт шәһәрләреннән килгән яшьләр дә бар. Түбән Кама - нефть сәнәгате шәһәре, шуңа да яшьләр бирегә бик теләп күченә, - диде Лариса Сулима.
Быел "Ятимнәрне һәм әти-әнисез калган балаларны торак белән тәэмин итү программасы" нигезендә 311 бала яңа фатирлы булды.