Татарстанда Бөек Ватан сугышы ветераннарының 78 проценты диспансеризация узган

Барлыгы исә республикада 9000нән артык Бөек Ватан сугышы ветераны, шул исәптән тыл хезмәтчәннәре, Бөек Ватан сугышында катнашучылар һәм инвалидлар, аларның тол хатыннары, блокададагы Ленинградта яшәүчеләр, балигъ булмаган концлагерь тоткыннары профилактик тикшеренү үтәргә тиеш. Диспансеризация «Дәвамлы һәм актив тормыш» илкүләм проекты буенча үткәрелә.

Татарстан Сәламәтлек саклау министрлыгы хәбәр иткәнчә, 6 924 Бөек Ватан сугышы ветеранына өйдә һәм амбулатор-поликлиника шартларында медицина ярдәме күрсәтелгән, 236 кеше стационар дәвалану алган. 

– Җиңү көне алдыннан без ел саен Бөек Ватан сугышы ветераннарына медицина тикшерүләре уздырабыз. Апрель ахырына кадәр без ветераннарның 100 процентын колачлыйбыз – бу безнең өстенлекле бурычларның берсе. Бөек Җиңүне якынайтучылар, Ватанны алгы сызыкта саклаучылар һәм фронт файдасына хезмәт итүчеләр өчен без эшли алырлыкның иң азы бу, - ди Татарстан Сәламәтлек министры Марсель Миңнуллин.