Халыкара татар теле олимпиадасының быелгы Гран-при ияләре кемнәр?

Олимпиаданың йомгаклау этабына узып, 500 катнашучы арасыннан иң-иңнәре дип сайланганнар алар! 

Быел Олимпиада кысаларында туган телүне белүдә 10 меңнән артык мәктәп укучысы һәм студент сыналган. Башта дистанцион форматта биремнәрне үтәгәннәр. Казанга чакырылганнары – 4 чит ил һәм Россиянең 28 төбәге вәкилләре. ТР Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе рәисе Марат Әхмәтов аларның һәркайсын милләтебезнең алтын баганасы дип атады. 

– Телебез - көндәшлек итәрлек 14 иң дәрәҗәле тел белән янәшә торган тел, бай тел, матур тел. Ул дәүләтле халыкның теле, бу телне камил белү, бу телдә сөйләшә һәм уйлый белү белән без бары тик горурлана гына алабыз. Безнең Тукаебыз, Җәлилебез, Гомәр Бәширов, Мөхәммәт Мәһдиевлар, Каюм Насыйрилар, Ризаэтдин Фәхретдиннар,   Курсавилар, Мәрҗанилар бар. Тагын кайсы халыкта менә мондый мәгърифәтле шәхесләр бар? Телдән башка милләт була алмый. Халкыбызның киләчәген матур итеп күрәсебез килә икән, үз телебезне менә шулай дәррәү бер зур гаилә булып сакларга һәм үстерергә тиеш, - диде үз чыгышында Марат Әхмәтов.

Татарстан мәгариф һәм фән министры Илсур Һадиуллин олимпиада җиңүчеләрен бүләкләү тантанасын Туган тел бәйрәме дип атады. Апрель ае ул бөек Тукаебыз белән бәйле ай. Мәгариф системасында аңа багышланган чараларның иң зурысы – шушы олимпиада, диде ул.   

–  Әгәр дә ел саен шулай балаларны чакырабыз, җыелабыз икән, димәк, безнең телебезнең киләчәге бар дигән сүз. Бу эшебезне кемгәдер күрсәтү өчен үткәрелми, биредә балалар үзләренең белемнәрен, сыйфатларын күрсәтеп, аны исбатлый алалар, - диде министр.