Ркаил Зәйдулла: «Бу спектакль үземә дә зур сабак булды»

Ниһаять, узган атнада нәни тамашачыга яхшы әкият карау мөмкинлеге туды. Бүген балалар өчен беренче чиратта тәрбияви спектакльләр кирәк. Шагыйрь, прозаик Ркаил Зәйдулла әсәре буенча куелган "Бүре җиләге" спектакле әнә шундыйлардан иде.

- Без күрелмәгән драматургиягә алындык. Спектакльгә музыканы композитор Мәсгудә Шәмсетдинова язды. Рәссамнар белән эшләү авыррак булды, чөнки алар Чаллыдан иде. Сәхнә теле буенча Мәдәният һәм сәнгать университеты доценты Флюра Хәмитова күнекмәләр бирде. Спектакльнең Татарстанның һәм Россиянең халык артисты Әзһәр Шакиров тавышы белән башланып китүе дә күңелле, - ди баш режиссер Илдус Зиннуров.

Әсәрдә туган якка мәхәббәт, патриотлык хисләре, туганнар арасындагы дуслык, татулык кебек кирәкле сыйфатларга урын бирелгән. Пәрдә ачылуга, сәхнәдәге декорациянең үзенчәлекле булуы күзгә ташлана. Вакыйгалар бер түгәрәк эчендә һәм аның тирәсендә бара. Артистларның ихлас уены да, курчаклар да үзләренә җәлеп итә.

- Бу спектакль үземә дә зур сабак булды. Театр директоры Роза Җаббарова 20 елга якын берәр әкият язарга чакыра иде. Ул тормышка ашты. Бик әйбәт спектакль килеп чыккан. Хәтта үземнең автор булуым да онытылды. Балалар да шундагы вакыйгалар эчендә яшәде, - диде Ркаил Зәйдулла.

Роза Җаббарова исә: "Яхшы спектакль талантлы драматург өстәлендә туа", дип бик дөрес әйтте.