Татарстан цифрлаштыруда алдынгы, ләкин бу әле эшнең башы гына.
Казанда 29-31 октябрьләрдә «Казан Экспо» халыкара күргәзмәләр үзәгендә Kazan Digital Week-2026 халыкара форумы эшли. Анда 76 илдән 21,7 мең кеше катнаша. Россия Президенты Владимир Путин тәкъдимендәге 2026 ел — Россиядә Халыклар бердәмлеге елы, шулай ук 2026 елда Казан — ислам дөньясының мәдәни башкаласы булып торуы форумга шигарь итеп алынган.
— Ясалма фәһемне кулланып, республиканың өстенлекле тармакларын комплекслы цифрлаштырырга кирәк. Татарстанда моның өчен шартлар бар: заманча инфраструктура тудырылган, югары технологияле компанияләр, IT-вузлар, экспертлар берлеге эшли. Татарстан цифрлаштыруда әйдаман урыннарны били, эшне актив дәвам итү зарур, — диде Татарстан Рәисе Рөстәм Миңнеханов форумны ачу тантанасында.
Форум кысаларындагы цифрлы технологияләр күргәзмәсендә Россиядән һәм чит илләрдән 230 компания катнаша. Россиянең цифрлы үсеш министры Максут Шадаев белән Татарстан Рәисе Рөстәм Миңнеханов күргәзмәне карап чыкты.
Түгәрәк өстәл утырышларында дәүләт идарәсендә, сәнәгатьтә, транспортта, мәгарифтә, авыл хуҗалыгында, мәдәниятта һәм башка тармакларда цифрлы технологияләрне куллану буенча тәҗрибә уртаклашу, хезмәттәшлекне үстерү турында сөйләшүләр бара.
- Мәсәлән, Татарстан Фәннәр академиясе форум мәйданчыгында яшь галимнәргә үзләренең фәнни хезмәтләрен тәкъдим итү мөмкинлеге тудырган. «Казан Экспо» халыкара күргәзмәләр үзәгендә Татарстанда яшәүче милләтләрнең фольклор ансамбльләре форумда катнашучыларны милли җырлар һәм биюләр белән сәламли.
Кызыклы яңалыкларны күзәтеп бару өчен безнең МАХ каналына кушылыгыз.
Дамир Бәдриев
Комментарийлар