Фәрид Низамиев: “Клип төшергәндә иң авыры матур йорт табу булды”

Иң авыры - халкыбызның йөзен кашы булырдай, милли бизәкле йортны эзләп табуы булды. Районнарның күп кенә авылларын иңләдем, ләкин күңелгә ошаган йортны таба алмадым. Шуннан соң ярдәмгә Интернет килде. Инстаграмда "татарский дом" дип эзләгәч, берничә генә йорт килеп чыкты. Шуларның берсе бик ошады, фото астына әлеге йортның адресын сорап хат юлладым, үземнең телефон номерларын калдырдым. Озак та үтмичә, минем белэн элемтәгә чыгып, әлеге йортның Кама Тамагында булуын, адресын, әлеге йортта бер бабай яшәвен әйттеләр.

Икенче көнне үк Кама Тамагына кайтып, әлеге йортны эзләп табып, йорт хужасы белән таныштым. Ул 93 яшьлек Фәйзи бабай Саттаров булып чыкты. Бик ачык йөзле, кунакчыл, гади карт клип төшерергә бик теләп ризалыгын да бирде.

Клипның составы исә төрлечә җыелды. Дуслардан Булат Шәрипов, баянист егет барыбызга да таныш Г. Камал театры артисты Фәннүр Мөхәммәтҗанов бик теләп риза булдылар.

Кызлар арасында конкурс аша сайланганнары да, туганнар, дуслар да булды. Барысы да зур көч куйды, тагын бер кат рәхмәт аларга. Әйткәнемчә, клипта халкыбызның гореф-гадәтләрен күрсәтергә тырыштык. Әби-бабайлар сөйләгәннән истә калган кичке уеннар, хат алышулар, егет белән кыз мөнәсәбәте, чишмә буенда очрашулар-танышулар, гармунга кушылып биюләр... Әнә шул күренешләрне мөмкин кадәр дөрес итеп тасвирлап бирергә тырыштык.

Тамашачы ничек кабул итәр, нинди бәя бирер, монысын әлегә әйтеп булмый, ошатсалар, безнең тырышлык юкка булмас иде! Иҗаттагы, тормыштагы яңалыклар бер-берсенә бәйләнеп бара. Яңа җырлар яздырабыз. Иҗатыма яңа автор килеп керде - Айдар абый Минһаҗев! Тиздән уртак иҗатыбызны да ишетерсез, Алла боерса. Концертлар оештыру турында да фикерләр бар, ләкин әлегә бу турыда зурлап сөйләргә иртәрәк, дип уйлыйм. Гомумән, эш күп булганда рәхәт миңа, тик утырасы килми, хәрәкәттә - бәрәкәт диләр бит, - ди җырчы егет Фәрид.