Гөмбәне ничек эшкәртергә?

Бу чынлап та шулаймы? Базарда, еш кына, әбиләр юл буеннан җыелган гөмбәләрне саталар, маринадлаган гөмбә яхшылап эшкәртелгән була бит инде, ул очракта да гөмбәнең зыяны бармы икән? Әмир Сәләхов, Казан.

Белгечләр, микологлар гөмбәне җыйган көнне үк эшкәртергә киңәш итә. Гөмбәне пакетка җыярга киңәш ителми. Иске, кортлаган, шикләнгән гөмбәләрне алмаска кирәк. Чөнки агулы гөмбәне кул белән генә тотсаң да, зыяны булуы бар, дип кисәтә Казан Дәүләт университетында Экология һәм табигатьне куллану институтының гомуми экология кафедрасы ассистенты Ким Потапов. Юл кырыеннан җыелган гөмбәләргә килгәндә, гомумән, базарда белмәгән кешедән гөмбә алырга кирәк түгел. Гөмбәнең бер үзенчәлеге бар – ул авыр металларны үзенә сеңдерә. Бактерияләрне үтерә. Транспорт йөреп торган юл буендагы гөмбәләр сәламәтлеккә зыян китерергә мөмкин. Агулы гөмбәгә килгәндә, шуны истә тотыгыз: ничә тапкыр эшкәртсәң дә, агулы гөмбәнең токсиннары бетми. Шул исәптән ал гөмбә – свинушка, халык телендә «дуңгыз гөмбәсе» дип йөртелә торганы да агулылар рәтенә керә.