Бүген «Шәһри Казан»ның беренче саны чыккан көн: ихлас теләкләрегез кабул булсын, укучыларыбыз!

Бездә бәйрәм: сезнең һәм безнең яраткан газетабызның беренче саны чыккан көн бит бүген! Кичәдән бирле котлаулар кабул итәбез, изге теләкләрегез өчен рәхмәт Сезгә, укучыларыбыз!

Карап торышка аз гына кебек тоелса да, шушы 27 ел эчендә атнасына өчәр дөнья күрүче һәр санны тудыруда күпме кешенең көче кергән һәм җан җылысы өрелгән, күпме хезмәткәр редакция тарихында эз калдырган, күпме укучы безнең газетаны кулына алган?! Саный китсәң, бик зур саннар чыгар иде...

Туган көн белән котлаучылар тиражларыбызның һәм язылучыларыбызның артуын, иҗат уңышлары, озын гомер тели "Шәһри Казан"га. Әлбәттә, ихлас теләкләрегез кабул булып, алдагы елларда бергә яшәргә, яшьнәргә язсын, хөрмәтле укучыларыбыз!