Чемпионат Татарстан тарихында – күренекле вакыйга

"Кадерле татарстанлылар! 2015 елның 24 июлендә Казанда спортның су төрләре буенча XVI дөнья чемпионаты ачыла. Анда 190 илдән 5 400дән артык спортчы, шул исәптән 1 161 Россия Федерациясе спортчысы көч сынашачак. Төп чемпионатта су спортының - алты, ә "Мастерс" турнирында - биш төрендә ярышлар булачак.

Спортның су төрләре буенча дөнья чемпионаты тамашачыларда кызыксыну, игътибар җәлеп итү дәрәҗәсе ягыннан дөньяның футбол мундиаленнән кала икенче урында тора, ә Казандагы ярышлар аларда катнашучы спортчылар һәм илләр саны буенча рекорд куячак. Татарстан башкаласындагы су бәйрәмен бөтен Җир шарында 4,5 миллиардтан артык кешегә телевизор экраннарыннан карау мөмкинлеге бирелә. Спортчылар 75 комплект медаль өчен ярыша. Бу көннәрдә без Россия спортчыларыннан һәм Россия җыелма командасы составындагы якташларыбыздан зур җиңүләр, ә анда катнашкан һәркемнән көрәш дәрте һәм спортта югары күрсәткечләргә ирешүләрен көтәбез.

Әлеге чемпионат - спорт өлкәсендә 2015 елда иң әһәмиятле дөньякүләм чараларның берсе, ә Татарстан һәм Россия тарихында - гаять күренекле вакыйга. Бу абруйлы халыкара чараны уздыру Россия Федерациясе Президенты Владимир Владимирович Путин һәм Россия Федерациясе Хөкүмәте, Халыкара ФИНА йөзү федерациясе ярдәме нәтиҗәсендә мөмкин булды. Ул - спорт объектларын әзерләүдә һәм ярышларны үткәрүдә катнашкан татарстанлыларның уртак тырышлык нәтиҗәсе.

Шунысын әйтергә кирәк: 2013 елда Казандагы XXVII Бөтендөнья студентлар уеннары шәһәребез спорт һәм транспорт инфраструктурасының нык үсүенә, халыкара дәрәҗәдәге корылмалар һәм объектлар төзелүенә китерде. Универсиада калдырган мондый мирас татарстанлыларның мәнфәгатьләренә, күмәк спорт һәм физкультура белән шөгыльләнүчеләр санын арттыруга хезмәт итә. Гамәлдәге спорт базасы талантлы спортчылар әзерләү мәйданчыгы булып тора, ә бу чемпионат һәм якындагы елларда уздыру планлаштырылган бик күп спорт төрләре буенча дөньякүләм башка ярышлар Казанның илебез спорт башкаласы дигән статусын ныгыта.

Универсиаданы уздыру барышында тупланган оештыру тәҗрибәсе һәм барлык дәрәҗәләрдә булдырылган контактларның әлеге чемпионатта да бик кирәкле булуын әйтеп китәр идем.

Бу елларда республикабыз, аның мәркәзе Казан шактый үзгәрде, матурланды. Кризис күренешләренә һәм Көнбатыш санкцияләренә карамастан, Татарстан икътисады тотрыклы үсештә. Кама индустриаль кластеры предприятиеләре, "Алабуга" махсус икътисадый зонасы, Иннополис үсешебезгә этәргеч бирә торган яңа таяныч нокталары булды. Милләтара һәм динара татулыкны һәм тынычлыкны саклап калу, килешенгән, кешеләрнең ихтыяҗларын канәгатьләндерүгә юнәлтелгән социаль сәясәт, мәгариф һәм фән өлкәсен үстерү, талант ияләренә төрле яклап булышлык күрсәтү республиканың социаль-икътисадый алгарышында өстенлекле юнәлешләр булып кала.

Быел совет халкының Бөек Ватан сугышында Җиңүенә 70 ел тулуны бәйрәм итү яшьләребездә ватанпәрвәрлек хисләре көчәюгә куәтле этәргеч бирде. Бөек Җиңү безнең өчен һәрчак әхлакый маяк булды һәм шулай булачак та.

2015 елны Парклар һәм скверлар елы дип игълан иттек. Быел уздырыла торган чаралар шәһәрләребезне һәм авыл-салаларыбызны тагын да бизәргә, аларны уңайлырак һәм күпләрне үзләренә тартып торырдай итәргә мөмкинлек бирәчәк. Татарстанда мәдәният һәм тарих һәйкәлләрен саклап калу юнәлешендә башкарыла торган игелекле эш, кунаклар кабул итү индустриясен үстерү Казанны һәм республиканың башка шәһәрләрен Россия күләмендә һәм халыкара күләмдә эшчәнлек алып баручы туристлык үзәкләренә әверелдерүгә юл ача.

Без чемпионатның кызыклы һәм бай мәдәни программасын да тәкъдим итәбез. Ярышлар үткән көннәрдә ФИНА паркында күпсанлы чаралар булачак, башкала музейлары һәм театрлары күргәзмәләр оештырачак, яңа спектакльләр күрсәтәчәк. 1 августта казанлылар һәм республиканың барлык кунаклары өчен Татарстан башкаласында Сабантуй бәйрәме уздырыла. Мәйдан батырлары, сәнгать осталарыбыз татар халкында спорт, ярыш-бәйгеләр ярату хисенең көчле, мәдәниятебезнең бай һәм үзенчәлекле булуын бөтен тулылыгы белән күрсәтә алырлар, ә чемпионатта катнашучылар, аны карарга килүчеләр йөрәгендә татарстанлыларның кунакчыллыгы, киң күңеллелеге җылы тәэсирләр калдырыр дип ышанам.

Казанда спортның су төрләре буенча 2015 елгы XVI дөнья чемпионаты һәм "Мастерс» категориясендә спортның су төрләре буенча XVI дөнья чемпионатында катнашучыларны, аның кунакларын, шулай ук республика халкын чемпионатның ачылуы уңаеннан ихлас котлыйм! Ярышлардан һәм мәдәни чаралардан читтә калмагыз! Әлеге спорт һәм яшьлек бәйрәменең якты сәхифәләре, шулай ук җиңүләр китергән куаныч, шатлык хисләре йөрәкләребездә мәңге саклансын!" - диелә аның мөрәҗәгатендә.