ОСАГО да яңара: «бонус-малус» үзгәрә, штраф арта

Транспорт чарасын идарә иткән һәр кешенең ОСАГО, ягъни автогражданлык җаваплылыгын мәҗбүри иминиятләштерү полисы булырга тиеш. Әгәр машинаны берничә кеше кулланса, аларның исем-фамилияләре полис графасына теркәлә.

Безнең «диапазон»

ОСАГОда тариф коридоры өскә һәм аска таба 20 процентка киңәйтелде. Физик затларның җиңел автомобильләре өчен база тариф ставкасы коридоры хәзер 2747-4942 сумны тәшкил итә, элек 3432-4118 сум диапазонында иде. Мотоцикл һәм мотороллерларга тариф 10,9 процентка киметелә, ягъни 867-1579 сум урынына 694-1047 сум була. Юридик затларның җиңел автомобильләренә – 5,7 процент, ягъни ставка 2058-2911сум.

Машина йөртүчеләр, транспорт чарасын идарә итү стажына һәм яшенә карап, элеккеге 4 урынына 58 категориягә бүленә. Категорияләргә бүлүдә исәпкә алынган нечкәлекләр: яшь, стаж, авариясез йөрү, авариягә юлыгу, двигательнең куәте, транспорт чарасын ел давамында яки сезонлы идарә итү һәм башка шартлар.

Транспорт чарасын идарә итү стажы 2 елга кадәр булган 16-21 яшьлек машина йөртүчеләргә максималь коэффициент 1,8дән 1,87гә кадәр артты. «Мультидрайв» полислары өчен дә коэффициент 1,87гә кадәр күтәрелде, бу полиста машина йөртүгә рөхсәт ителгән кешеләр саны чикләнелми.
Яңа күрсәтмәдә стаж һәм яшь өчен ташламалар каралган. Иң зурысы – 7 процент (0,93 коэффициентына туры килә), ул 6 ел һәм аннан күбрәк стажы булган 59 яшьтәге һәм аннан өлкәнрәк яшьтәге машина йөртүчеләргә генә билгеләнә.

«Бонус-малус»

Быелның 1 апреленнән ОСАГОда «бонус-малус» коэффициентын (КБМ) бирү тәртибенә дә үзгәрешләр кертү ниятләнелә. Бу – һәлакәтләрсез йөргән өчен ташламалар һәм автоһәлакәт булган очракта өстәмәләр бирү мәсьәләсенә кагыла. Төрле сәбәпләр аркасында машина йөртүдән туктап торган очракта да, «бонус-малус» юкка чыгарылмый, ягъни «ноль»гә әйләндерелми. Аварияләрсез йөрсәң, полис бәясе ел саен 5 процентка киметелә.

Штраф арта

Транспорт чарасын ОСАГО полисың булмаган килеш идарә итү бик кыйммәткә төшәчәк. Мәгълүматларга караганда, Россия төбәкләрендә юлларга куелган махсус видеокамералар ОСАГО полисы булмаган машиналарны ачыклаячак. Ел башында 800 сум штраф салына. «Шушы штрафны түлим дә йөрим», – дип ялгышмагыз. Ничә видеокамерага эләксәгез, шуларның барысына да түләргә туры киләчәк. Быелның ахырына штраф инде 8 мең сумга күтәреләчәк.