«Сәләт» быелгы сәлкешләр өчен ниләр әзерләгән?

«Сәләтле җәй» ял итү кампаниясе кысаларында быел төрле аланнар эшләячәк, форумнар узачак. Татарстан, Башкортстан, Чуашия һәм Кырым базаларында 25 профильле смена, 6 форум үткәрү планлаштырыла. Аларда 7-18 яшьлек балалар һәм яшүсмерләр катнашачак.

-    Һәрбер алан ул , әлбәттә, зур эш, зур команда. Бу эш ел дәвамында алып барыла. Кешедә ел саен ниндидер үзгәрешләр була бит, «Сәләт» тә ул җанлы мохит, күренеш. Оешма да ул, хәрәкәт тә. Шуңа күрә үзгәрешләр дә шактый. Әмма иң зур үзгәреш, минемчә, ул катнашучыларда, әйдаманнарда. Балалар саны артыр дип планлаштырабыз, - диде Татарстан Республикасы Рәисе ярдәмчесе, «Алдынгылар хәрәкәте» оешмасының республика бүлеге җитәкчесе Тимур Сөләйманов.

Татарстан Республикасы яшьләр эшләре министры урынбасары Айгөл Сабирова сүзләренчә,  «Сәләт»нең масштаблары бүген Татарстанга гына түгел, бөтен дөнья буйлап та таралган дип әйтергә була.

-    Сәләтлеләр өчен дә, безнең өчен дә «Сәләтле җәй» – ул бер кульминацион халәт,  ял итү кампаниясе дәверендә татар телен саклап калуга гына түгел, ә, гомумән, сәләтле балаларны һәм яшьләрне туплау, аларның талантларын тагын да камилләштерү, арттыру буенча төрле чаралар оештырабыз, аларны ел дәвамында әзерләп киләбез, – ди Айгөл Сабирова. 

«Сәләт» аланнары 25 майдан алып 30 августка кадәр үз эшчәнлеген дәвам итәчәк. 700 кешелек әйдаманнар командасы әзерләнгән, аланнарда һәм форумнарда шулай ук 700 дән артык укытучы һәм остаз эшләячәк. Җәй дәверендә 10 меңнән артык бала ял итә һәм өстәмә белем туплый алачак. 

«Сәләт» 7 көнлек сменалар да, 18 көн дәвамында эшләгән аланнар да оештырачак. Аларның һәркайсының үз юнәлеше бар: 7-11 яшьлекләр өчен медиа, олимпиадаларга әзерлек, инженерлык осталыгы, татар телен һәм әдәбиятын тирәнтен өйрәнү. Ә өлкәнрәкләргә лингвистика, архитектура, дизайн, смм, төрле фәннәрне тирәнтер өйрәнү, иҗат юнәлешләре тәкъдим ителә. 

Сменаларда катнашу өчен бөтен яуланган уңышларыңны күрсәтеп, грамота-дипломнарны беркетеп, гариза язарга кирәк. Сайлап алу конкурс нигезендә оештырыла. Элек-электән эшләп килгән «Сәләт-Раушан», «Сәләт-Рухият» кебек сменаларга конкурс бер урынга 8-9 кеше тәшкил итә, яңарак сменаларга бер урынга 2-3 кеше дәгъва итә. Сменалар арасында әти-әниләр өчен тулаем бушлай булганнары да (алар республика бюджетыннан финанслана), түләүлеләре 7-8 башлап 40 мең сумга кадәр җитә.