Ак халатлы шәфкать ияләре

Авыл табибы дип ялгыш әйтмәдем, чөнки авыл җирендә эшләүче фельдшерлар, чын мәгънәсендә, табиб вазифасын үтиләр. Авыру кешенең зарын тыңлап, аның кичерешләрен аңлау, хәленә керү өчен нечкә күңел, ә катлаулы һәм киеренке шартларда ситуацияне аңлап, дөрес карар кабул итү, ашыгыч ярдәм таләп ителгәндә кеше гомере өчен җаваплылыкны үз өстеңә алу өчен алардан күпме көч, нык­лык, сабырлык һәм тирән белем таләп ителә. Ишеген бәхетсезлек какканда, чир аяктан екканда, авыл халкы иң башта авыл фельдшерына мөрәҗәгать итә.

Үзенең хезмәт юлын 1960 елда иске генә авыл пунктында башлап җибәргән Вера апа Нәкыйпова, төп вазифасы белән беррәттән, яңа бина төзү кебек, ирләр ныклыгы таләп ителгән эшне башкарып чыга алуында гаиләсенең аны аңлап, һәрчак таяныч булуы ярдәм итте дип саный. Аның эшен дәвам иткән Зөлфия Галимуллина, Роза Гарифҗановалар да: «Төнме ул, көнме, буран яки яңгырмы – бер кешенең дә үтенечен кире какмадык – авыруларга кулдан килгән кадәр ярдәм иттек, тормышыбыз авылдашлар күз алдында булды», – дип искә алалар. Аларны бүген дә авыл халкы: «Һәркемнең тәнен генә түгел, ягымлы сүзләре белән күңелен дә сихәтләндерә белделәр» – дип, хөрмәт белән искә ала.

Табиб язган дарулардан тыш, физиотерапия процедуралары да сәламәтлек өчен зур әһәмияткә ия. Озак еллар Арпаяз авылы профилакториенда эшләп, бүген эшен Кукмара үзәк район хастаханәсендә дәвам итүче Мәрзыя Шәрәфиева да авылдашларының да, хезмәттәшләренең дә ихтирамын яулаган.
Авыл җирендә фельдшер булып эшләү бервакытта да җиңел булмаган, бүген дә иң катлаулылардан санала. Замана үзгәрү белән беррәттән, кешеләр дә, чирләр дә үзгәрә. Өлкән хезмәттәшләренең эшен бүген Гөлирә Мөхәммәтова лаеклы дәвам итә. Укол ясыймы, система куямы, башка дәвалау чарасымы– һәр процедураны пөхтәлек, төгәллек белән, иң мөһиме, яратып башкара. Аны иң борчыган мәсьәлә – бүген күпләрнең, профилактик прививкалардан баш тартып, үзләренең, балаларының, тирә-юньдәгеләрнең сәламәтлекләрен куркыныч астына куюын яшерми.

Үтә дә җылы, эчтәлекле әлеге кичәне оештыручы Фирдәүсә Галимова янәшәбездә яшәп, без йөргән сукмаклардан йөреп, олы йөрәкләренә күпләрнең борчу-сызлануларын, хафалануларын сыйдыра алган, алдагы көнгә ышаныч уяткан ак халатлы «фәрештәләргә» тагын бер кат баш ияргә, рәхмәт сүзләрен җиткерергә мөмкинлек бирде. 

Фәния Гарипова, Кукмара.