Бакчачылар Президент белән бәйрәм итте

Лаеш, Чаллы, Түбән Кама, Биектау, Югары Ослан, Тукай, Яшел Үзән һәм башка районнарның бакчачылык ширкәтләре җиләк-җимеш, яшелчәләрдән бай күргәзмәләр, мастер-класслар оештырган иде. Шунда ук чәчәк, җиләк-җимеш агачлары үсентеләре сатылды. кунаклар өчен самавыр кайнап торды, табада коймаклар чыжылдады. Яшелчә һәм җиләк-җимеш сокларын да тәкъдим иттеләр. Бәйрәм җыр-биюдән башка узмый, үзешчән артистлар концерт номерлары да әзерләп килгән иде.
Бәйрәмгә килгән Татарстан Президенты Рөстәм Миңнеханов үзенең чыгышында быел бакчачылыкның аеруча актуаль булуын билгеләп үтте.
- Пандемия шартларында халыкка каядыр барырга, нәрсә белән булса да шөгыльләнергә кирәк иде. Һәм шунда бакчалар үзләренең мөһимлеген раслады. Бакчасы булган кеше табигый чиста продукт белән туклана, кышка запас әзерли. Без исә алга таба да ярдәм итәчәкбез, - дип, ул бакчачыларга яхшы кәеф һәм уңышлар теләде.
Татарстанда барлыгы 900дән артык коммерцияле булмаган бакчачылык ширкәте теркәлгән. 1 миллионнан артык граждан гомуми мәйданы 20 мең гектар булган 376 мең бакча кишәрлегеннән файдалана. Татарстан җитәкчелеге бакчачыларга актив ярдәм күрсәтә. 2017 елдан башлап бакчачыларның проблемаларын хәл итүгә 500 млн сумнан артык акча бүлеп бирелде. Өч ел эчендә бакчачылык эшләре 1 млрд 650 млн. сумга финансланган. Бу 151 су башнясы куярга, 83 скважинаны ремонтларга, 26 чакрым суүткәргеч үткәрергә, каты көнкүреш калдыкларын җыю һәм чыгару өчен 359 мәйданчыкны норматив хәлгә китерергә мөмкинлек бирде. Моннан тыш, 92 чакрым керү юлы ремонтланган, 116 км электр линиясе һәм 118 комплект трансформатор подстанциясе эше җайга салынган.
Бакчачылык ширкәтләренә ярдәм программасы нигезендә бик күп проблемаларны чишә алдык, дип сөйләде Биектау районының "Фотохимик" бакчачылык ширкәте рәисе Любовь Максимова. Ширкәттә 325 бакча участогы исәпләнә. 
- Бакчачылар үзара бик дус, аңлашып яши. Дәүләт ярдәме белән яңа гына скважина куйдык, су торбаларын урнаштырабыз. Электр челтәрләрен алыштырырга җыенабыз. Безнең бер сум акчага дәүләт ике сум бирә. Бу программага кадәр барысын да үз акчабызга эшли идек. Акча аз булгач, эшләр акрын бара иде. Хәзер барысы да күзгә күренеп үзгәрә, - ди ул.
Лаеш районының 876 бакча участогын берләштергән "Титан" бакчачылык ширкәте рәисе Вера Калмыкова 2017 елдан бирле ике скважина, өч су башнясы куелуын, өч контейнер мәйданчыгы төзелүен сөйләде. Быел үзәк аллеяда 2 чакрым юл салыначак. Дәһләт булышмаса, моның кадәр зур эшләрне бакчачылар үзләре генә башкарып чыга алмас иде, диде ул.