Быел Казанда 382 гаиләгә җир кишәрлеге бирелгән. Азмы бу, күпме?

Башкалада быелның беренче яртысында күп балалы 382 гаилә Биектау районының Яшь Көч авылы яныннан бушлай җир кишәрлеге сайлап алган. Шәһәр хакимиятендә узган дүшәмбе киңәшмәсендә Казан мэры Илсур Метшин бу программаның алга таба да дәвам итәчәген әйтте.

– Бушлай җир кишәрлеге алу хокукы булганнар исемлегендә 14094 гаилә теркәлгән. Ел башыннан әлеге исемлек тагын 452 гаиләгә тулыланды, – диде үзенең чыгышында шәһәр Башкарма комитетының җир һәм мөлкәти мөнәсәбәтләр комитеты рәисе Ренат Галәветдинов.

Татарстан башкаласында җир белән тагын 7469 гаиләне тәэмин итәргә кирәк әле. Алар өчен Колсәет, Сокуры һәм Каймары авыллары тирәләрендә кишәрлекләр хәстәрләнелә. Ренат Галәветдинов сүзләренә караганда, Биектау районында федераль территориядән 963,6 гектар җирне документлаштыру буенча эш бара. Әлеге җирдә 3972 кишәрлек оештырырга мөмкинлек туачак. 

Казан мэры Илсур Метшин үзенең фикерләре белән уртаклашканда мәсьәләнең җитди булганлыгын яшермәде.
– Күп балалы гаиләләрне җир кишәрлеге белән тәэмин итү – гамәлгә ашыру ягыннан иң катлаулы программа, – диде Илсур Метшин. – Программа башында 2 мең генә гаилә теркәлде. Ләкин, Казанда җир кытлыгы хөкем сөргәнлектән, бу сан да башкарып чыга алмаслык булып тоелган иде. Татарстан Президентына, күрше районнарга, лэндлордларга рәхмәт! Без инде күп балалы 6,6 мең гаиләгә җир бирә алдык. Әмма Казанда тагын 7 меңнән артык гаилә чиратта тора әле. Быел 382 күп балалы гаиләгә кишәрлек бирдек. Күп балалы гаиләләргә бушлай җир кишәрлеге бирү эше алга таба да дәвам итәчәк.