Шәһри Казан

Читтәгеләр дә кадерле: төбәкләрдә чыга торган татар басмалары вәкилләре Казанга җыелды

Татарстаннан читтә дистәләгән газета-журнал дөнья күрә. Республикада татар журналистикасы өлкәсендә кадрлар, темалар белән кыенлыклар аз түгел. Ә күз алдыгызга китерәсезме Казаннан 800-1000 чакрым ераклыкта урнашкан калаларда татар журналистикасы гына түгел, ә гомумән, татар телле укучыларны табу проблемасының ни дәрәҗәдә зур икәнен?!

Читтә яшәүче хезмәттәшләребезнең проблемаларын чишү, аларга ярдәм итү йөзеннән “Татмедиа” республика матбугат һәм массакүләм коммуникацияләр агентлыгы җитәкчесе Айдар Сәлимгәрәев, “Татмедиа” АҖ генераль директоры Шамил Садыйков һәм “Шәһри Казан”, “Без бергә” газеталары баш мөхәррире Радик Сабиров хезмәттәшләре белән очрашты.

Айдар Сәлимгәрәев очрашу барышында Россиядә халык санын алу алдыннан эшчәнлекне тагын да көчәйтергә, социаль челтәрләрдә активлашырга өндәде.

- Коронавируска карамастан, эшне көчәйтү, яңа ысуллар эзләү, халык белән яңача эшләү, милләттәшләребезне үзебезгә тарту мөһим. Һәркем кирәк. Сан алу зур эш. Төбәкләрдә татарлар күбрәк булса, сезгә дә җиңелрәк булачак,— диде Айдар Сәлимгәрәев.

Ул шулай ук кунакларга ТАССРның 100 еллыгы уңаеннан чыгарылган истәлек билгеләре, кайбер редакция җитәкчеләренә Рәхмәт хатлары тапшырды.

Бу очрашуда бүләкләр мулдан булды. Шамил Садыйков, мисал өчен, редакцияләрдә Татарстан Президенты Рөстәм Миңнеханов ярдәме белән алынган техник җиһазлар бүләк итте.

Акционерлык җәмгыяте җитәкчесе хезмәттәшләргә социаль челтәрләрдә аудиторияне арттырырга кирәклеген дә искәртте.

Реклама

- Инстаграм ул — акча эшләү, аудитория җыю, тәэсир итү коралы. Сез хакимият өчен дә, җирле җәмгыять оешмалары өчен дә кирәк булачаксыз. Бер ун еллап газеталар әле булыр, ләкин алга таба ун ел эчендә татар җәмәгатьчелеге белән яңача эшләүгә әзерлек кирәк,— дигән фикерен җиткерде Шамил Садыйков.

Сүз уңаеннан, Татарстанда 80 процент халык Интернет белән файдалана. Аларның 60 процент чамасы социаль челтәрдә икәнен исәпкә алсак, Шамил әфәнденең хаклы булуына тагын бер инанасың.

- Хәзер Инстаграм — иң актив үсә торган, беренче номерлы сервер. Безең өчен бу — бик мөһим эш. Без сезгә төрле яклап булышырга риза: методика, эшләү алымнары белән дә. Җирле татарларны махсус рәвештә җыярга кирәк. Газетларга QR-кодлар куярга һәм шушы аудиторияне инстаграмда җыярга була, - дигән тәкъдимнәрен яңгыратты җитәкче.

Ярдәм ул акча һәм яңа компьютерлар гына түгел, ә рухи яктан булышу, белемнәр белән уртаклашу да. Шул максаттан, “Татар-информ” МА татар редакциясе шеф-редакторы Алсу Исмәгыйлова социаль челтәрләрдә эшләү үзенчәлекләре белән таныштырды. Ә “Татар-информ” МА татар редакциясе баш мөхәррире Рәмис Латыйпов Татарстаннан читтә чыга торган басмаларга күзәтү ясады, уңай һәм тискәре якларын күрсәтте.

- Социаль челтәрләр сайт күчерелмәсе түгел, хәзерге моментта кеше аралаша торган мәйдан. Без тарала торган контент әзерлибез. Социаль челтәрләр — контент тарату мәйданчыгы, - диде Алсу ханым һәм бу өлкәдә эшләү буенча киңәшләрен бирде.

Лилия ЛОКМАНОВА

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: