Данир Сабировның концертында бомба куелган диелгән хәбәр Мөслим районыннан килергә мөмкин

Данир Сабиров концерты дәвам итә. Концерт башы белән чагыштырганда, тамашачыларның саны арткан да булырга мөмкин.

Популяр җырчы, шоумен Данир Сабиров концертында килеп чыккан мәхшәр турында язган идек. Билгесез берәү шалтыратып, әллә чынлап, әллә Данирның концертын өзәргә теләп, "УНИКС" концертлар залында куркыныч хәл турында - бомба куелуы турында шалтырата. Халыкны - тамашачыларны һәм "УНИКС"та булган барча халыкны урамга чыгарырга туры килә.

Данир Сабиров үзе дә яраткан тамашачылары янына чыга. Шунда ук халыкның кәефен күрә башлый, алар белән иске заманнардан калган "микрофон" аша аралаша. Хәвеф-хәтәр өчен борчылырлык сәбәп юк, дип әйткәч, халык - тамашачылар да, персонал да яңадан концертлар залына керә һәм концерт дәвам итә.

Беренчел мәгълүматлар буенча, шартлаткыч матдә куелган дигән шалтырату Мөслим районыннан килеп ирешкән. Әлегә ул номер "не доступен" икән.

Ә концерт дәвам итә. Данир фикеренчә, залга әле тагын да күбрәк кеше кергән, ахры: "Концертта мең кеше генә иде, мең ярым булган, ахры".

Без дә, барысы да тыныч, имин тәмамлануына шатланабыз!