Дүрт көн буе яшь ананың гомере кыл өстендә була 

«Барысы да салкын тиюдән башланды. Ул вакытта мин инде йөклелекнең 37нче атнасында идем һәм моңа кадәр сәламәтлегемә зарланганым булмады. Терапевт миңа ОРВИ диагнозы куйган иде, хастаханәгә ятудан баш тарттым, өйдә табиб күзәтүе астында дәвалана башладым. Өч көннән соң, 9 декабрьдә, хәлем кискен начарланды, калтырата башлады, ашыгыч рәвештә республика клиник перинаталь үзәгенә җибәрделәр», — дип сөйләгән «Башинформ» басмасына Уфада яшәүче 21 яшьлек Виктория.

Табиблар пациентка бавыр авыруы диагнозы куя. Моннан тыш, карындагы балага һава җитми башлый һәм шуңа күрә гинеколог баланы кесарев кисеме белән таптырырга була. Операция ярдәмендә 2,490 грамм авырлыктагы малай дөньяга килә.

—  Бала тапканнан соң ук мине реанимация бүлегенә күчерделәр, ул вакытта мин аңымда идем һәм күбрәк бала өчен борчылдым. Башка берни дә хәтерләмим, - дип дәвам итә Виктория күз яшьләре белән. - Табиблар сүзләренчә, бавырым эшләми башлаган. Ашыгыч рәвештә Мәскәүдәге медицина ярдәме күрсәтү үзәге белән телемедицина консультациясе үткәрелгән. Бавырны күчереп утырту өчен федераль үзәккә алып барырга әзерли башладылар. Ләкин 12 декабрьдә минем хәлем кискен начарланды, сулыш алу белән проблемалар барлыкка килде, үпкәне ясалма җилләтү аппаратына тоташтырдылар. Мәскәүгә бару кичектерелде.

Дүрт көн буе яшь ананың гомере кыл өстендә була, табиблар ад бернинди фаразлар бирми. Яшь хатынның ирен һәм әти-әнисен иң куркыныч нәтиҗәгә әзерлиләр. Бу вакыт эчендә медиклар бригадасы яшь әнине коткару өчен кулдан килгәннең барысын да эшли. Федераль үзәкләр белән дә, республиканың башка учреждениеләреннән килгән белгечләр белән дә бик күп телемедицина консультацияләре үткәрелә.

— Нәрсә булганын белми дә калдым, йокы яки галлюцинация булдымы... Ләкин мин зур ак багананы хәтерлим, аннары ул карага әйләнде. Курку барлыкка килде һәм күз яшьләре акканы исемдә калган. Табибның: "Син бирешә алмыйсың!" дигән сүзләрен хәтерлим. Икенче бер тавыш иремнеке иде. Аны берникадәр вакытка яныма реанимациягә керткәннәр. Шуннан соң мин аңыма килә башладым, күзләремне ачтым, ул миңа улыбызның рәсемнәрен күрсәтте. Сабыемны күрәсем, кулларыма аласым килде. Бу гаҗәп, ләкин шуннан соң тиз арада терелә башладым, шулай да миңа яңабаштан йөрергә, сөйләшергә, кашык тотарга өйрәнергә туры килде. Моның өчен янәшәмдәге, мине яклаган һәм тормышым өчен көрәшкән барлык медикларга, якыннарыма чиксез рәхмәтлемен. Моны һәркем белергә тиеш: бездә иң яхшы табиблар, - ди Виктория.

Бер атнадан соң, 20 декабрьдә, яшь хатын реанимациядән яңа туган баласы янына, бала тудыру бүлегенә күчерелә. Яңа ел алдыннан бәхетле әти үз гаиләсен өйләренә алып кайта. Республика клиник хастаханәсенең Перинаталь үзәге коллективының профессиональлеге һәм бердәмлеге аркасында тагын бер бәхетле пар яңа елны сабыйлары белән каршы ала.

"Үлем белән йөзгә-йөз очраштым һәм аны җиңдем. Иң мөһиме, бүген безнең гаилә бергә, үземне яхшы хис итәм, бала үсә. Бу иң яхшы яңа ел могҗизасы!" ди Виктория үзе.

“Башинформ”