Гөлүсә һәм Наил Насыйбуллиннар: «Үзең эшләгәч, акча да янга кала»

– Әтиебез бар эшне дә булдыра торган кеше иде. Авылда эретеп-ябыштыручы булып эшләде. Без дә кечкенәдән аңа ияреп йөри торган идек. Бөтен белгәнен безгә өйрәтеп калдырырга тырышты. Соңыннан үзем дә әти булгач, белгәннәремне улларыма өйрәтә башладым. Ике улыбызга үз тырышлыгыбыз белән йорт тергезеп, башка чыгардык. Өченче кызыбыз да кияүдә. Менә хәзер аларга өй җиткезеп киләбез, – ди гаилә башлыгы.

Буыннан буынга күчеп килгән һөнәри осталыкларын улларына тапшыра алуы белән дә бәхетле ул.

– Балалар бөтен эшне белә. Агач эшен дә, җылылык, электр уты кертү, кирпеч салу, тарттырылган түшәмнәр җәюне дә үзләре башкара. Бер тапкыр мин эшләгәнне карап торалар да, икенче юлы тәвәккәлләп, үзләре тотыналар. Әле олы улыбыз йортының икенче катын эшли башлады. Каенсеңелебезгә дә өй салдык. Үзебез эшләгәч, акча да янга кала. Төзелеш материалларына гына чыгым чыга. Барысы да балаларны үзебез янында калдыру теләге белән эшләнелде. Алар авыл тирәсендә булсыннар дип тырыштык, – ди Наил абый.

– Алар монда булгач, үзебезнең дә күңелебез тыныч, – дип сүзгә кушыла Гөлүсә апа. – Гел йөрешеп, аралашып торабыз. Балалар терлеген асрыйлар, бәрәңгесен, яшелчә, җиләк-җимешен үстерәләр. Үзебезнең дә сыерларыбыз, атларыбыз бар. Үз җирләребезне үзебез эшкәртәбез. Печән чәчәбез. Аны эшкәртер өчен трактор сатып алдылар.

Насыйбуллиннар сөтен, итен шәһәргә дә алып чыгып тормыйлар икән. Авылдашлары сатып алып бетерә ди. Сатудан калган сөттән эремчек ясыйлар, каймак аерталар.
Авыл Казаннан ерак булмагач, якында гына зур комбинатлар, кош фабрикалары, аэропорт булгач, йөреп эшләргә хезмәт урыннары да җитәрлек. Наил абыйның үзенең дә бертуганнары арасында бер апаларыннан кала, барысы да туган авылларында яшәп калган.

– Шундый ныклы таянычым, акыллы, тырыш ирем булганына язмышыма бик рәхмәтлемен. Кулыннан килмәгән эше юк аның. Һәр баланың гаиләсенә бишек ясап бирде. Карават башлары да ясый, – дип елмая Гөлүсә апа. Аннан соң тыйнак кына итеп әйтеп куя. – Мактана дип уйлый күрмәгез тагын, үзегез сораганга гына әйтүем.

Гөлүсә Насыйбуллина тәмле ризыклар рецептларын «Шәһри Казан» укучыларына тәкъдим итә.

Куертылган сөт (сгущенка) ясау рецепты

Өч литр салкын сөткә бер килограмм шикәр комы, бер аш кашыгы уксус, бер чәй кашыгы сода саласың да утка утыртасың. Газны кабызып, сөт күтәрелгәнне карап торасың да, кайнап чыккач, болгата-болгата, 1,5 сәгать тирәсе сүрән утта кайнатасың. Шул вакыт эчендә сөт көрәнсу төскә керә. Әзер сгущенка су шикеле агып төшми, тама-тама да кашыкта эләгеп кала. Шуннан соң газны сүндереп куябыз.

Лаеш, Хәерби