Иң тәмле бәлеш кара табада пешә, көйми, ябешми, яки хатын-кызның уңганлыгы табасыннан күренә?

Гөлнур Әгъзамова: Пешермәсәң, таба да каралмый, пешергәч карала инде. Элекеләр әйтә иде: каралган табада камыр әйбәтрәк пешә дип. Үземнең дә 35 ел элек алган табам бар, яратам да инде шуны, Элек мичтә пешергәч каралган инде ул.

Фәния Хәйбуллина: Мин шулай, килен булып төшкәч, кайнананың авыл мичендә пешергән табаларын чистарттым. Бакчада, малларга пешерә торган мичтә. Бик үкендем соңыннан. Әле ярый дүртесен генә юдым шулай. Өр-яңа кебек булдылар булуын. Әммә шуннан соң ул табаларда пешергәндә бәлешләр ябыша торган булдылар. Духовкада кыздырып та карадым. Барыбер ябыштырдылар. Кайнанадан эләкте дә инде үземә. Кычытмаган җиреңне кагылсаң, шул була икән ул. Табаның тышы кара дип, беркем дә бәлешләрне ашамый калмый. Аның эче чиста бит. Хәзерге табалар, элеккеге кебек әйбәт пешерми. Табаның чималы башка ахрысы аның. Әниемнең табалары күп иде. Ул бирде дүртне. Ничек кенә каралсалар да, хәзер ул табаларны агартам дип уйламыйм да. Бик кадерләп саклыйм аларны. Бәлешләр дә аларда шундый әйбәт пешәләр.

Ландыш Гарипова: Кызлар, менә шулай итеп кайнанамның яшь чагыннан бирле үзе мичтә ничә ел буе пешергән табасын чистартып, аның бөтен истәлеген бетериммени инде чиста булам, дип? Миндә 23 ел кара таба, иң тәмле бәлеш шунда пешә, көйми, ябешми, тоткан саен әнине искә алам. Мич табасын агартып та булмас инде аны. Зур ашларда пешерә торган Кукмара табаларым да бар, но берсе дә әни табасына җитми инде. Күргән кеше бәлки гаеплидер дә, кай кеше гаепләргә бик ярата бит, бигрәк тә айга бер дә пешеренмәгәннәре, андый кешеләр дә кирәк, берсен дә гаепләмим. Исән-сау булыйк, килер кунакларыбыз булсын, балаларыбыз да бездән соң яратып иске табаларыбызда пешеренсеннәр.

Фирдания Фәйзелханова: Табаны куллануга юып куярга кирәк, ул вакытта таба каралмый.

Мәрьям Хәйруллина: Аллаһка шөкер, пешереп тә торабыз, пешергэн саен, тимерчыбык белән ышкып, юып та куябыз. Артык каралмый.

Эльза Сираҗова: Нашатырный спирт бик әйбәт чистарта, өр-яңа кебек була, ябыштырмый да.

Әнисә: Ком белән духовканың иң аскы рәтенә куегыз табаны. Ялт итә.

Кәүсәрия Ильясова: Кияүгә чыгып яши башлаганда алынган табаларым каралып, авыраеп бетсәләр дә, алыштырырга һич уйламыйм. Бәлеш, пирог, тәбикмәк, шәңгәләрне бик әйбәт пешерәләр. Бер табамны тоз тутырып салып, духовкада кыздырып чистартып караган идем, ябыштыра торган булып калды. Табаларның буш торганы юк, пешеренеп кенә торабыз. Тик торсалар, ак килеш торырлар иде.

Әнисә ханым: Күпме кеше, шулкадәр фикер. Башыгызны катырмагыз. Пешерергә табалары да, ризыклары да булып торсын!

Фикерләрнең бер өлеше генә бу. Ә Тәслимә ханымның киңәше мондый иде: Бер чиләк суга 6 флакон кәгазь клее, кыргыч аша үткәрелгән бер хуҗалык сабыны, бер кап кальций содасы салабыз. Табаларны шуңа салып 4-5 сәгать дәвамында кайнатабыз. Шуннан соң аларны алып тимер щетка белән юарга кирәк. Табалар кибеттә сатып алынган халәтенә кире кайтачак.

Вконтактедагы төркемебезгә сезгә дә кушылыгыз: https://vk.com/shahrikazanda