Илсур Метшин: "1 сентябрьгә уку йортларында яңа куркынычсызлык системасы булдырырга кирәк"

Бу хакта Татарстан башкаласы Мэры Илсур Метшин шәһәр Башкарма комитетында эшлекле дүшәмбедә әйтте. «Әлеге вакыйга белән килгән яра авыр, әмма, һичшиксез, балаларны һәм мәктәп хезмәткәрләрен гадәти тормышка кайтарырга кирәк», – диде Мэр.

11 май Казан тарихында мәңгегә фаҗигале көн булып калачак. Без Россиянең һәм дөньяның төрле шәһәрләреннән ярдәм агымы өчен рәхмәтле. Балаларын югалткан ата-аналарның хәсрәте белән берни дә чагыштырырлык түгел. Бу кайгыны бөтен дөнья буйлап меңләгән, миллионлаган кеше, бөтен иксез-чиксез ил буйлап бүлеште, – диде И.Метшин. – Федераль һәм республика хакимият органнары белән бергә без бүген вәзгыятьне хәл итү өстендә эшлибез».

Ул хәбәр иткәнчә, хәзерге вакытта гадәттән тыш хәл аркасында зыян күргән ике бала республика балалар клиник хастаханәсеннән чыгарылган. Шәһәр клиникаларында 13 кеше кала, тагын 8 зыян күрүче Мәскәүдә федераль медицина үзәкләрендә дәвалана. «Дәвалау барышы турындагы мәгълүматны көн саен зыян күрүчеләрнең әти-әниләренә хәбәр итәләр. Мәскәүгә дәваланырга җибәрелгән балалар анда әти-әниләре белән бергә», – диде Илсур Метшин.

РФ Тикшерү комитеты тикшерү үткәрә. Балаларын һәм якыннарын югалткан гаиләләргә ярдәм күрсәтелде, зыян күргән балаларның һәм өлкәннәрнең гаиләләренә ярдәм чаралары күрелде, дип искәртте шәһәр башлыгы.

175-нче гимназия бинасын капиталь төзекләндерергә карар кылынды. «Без әти-әниләр белән балалар уку елын ничек тәмамлаячагын хәл итү өчен гимназиянең барлык параллельләрендә ата-аналар җыелышлары уздырдык. Хокук саклаучылар мәктәп эчендә эшне төгәлләү белән, без алар белән бергә, психологлар белән дә мәктәпне торгызу буенча киңәшләшәчәкбез», – дип билгеләде Мэр.

Шәһәр башлыгы психологик ярдәм хезмәтенә, мәгариф министрлыгына һәм Россия Гадәттән тыш хәлләр министрлыгы хезмәткәрләренә аерым рәхмәт белдерде. «Бу безгә ярдәмгә килгән чын профессионаллар», – диде ул.

И.Метшин сүзләренчә, 175-нче номерлы гимназиядә куркынычсызлык системасы эшләде. Шулай итеп, видеокүзәтү камераларының барлык 54 камерасы да сурәтне тапшыра, хәбәр итү системалары, метал эзләү җиһазы, янгын сүндерү сигнализациясе һәм хәвеф төймәсе эшли, ә директор кычкырып сөйләүче аша гимназиядә булган барлык гадәттән тыш хәл турында кисәтә алган, бу исә укучыларның һәм укытучыларның дистәләгән гомерен коткарган, әмма вәзгыять гади булмаган.

«Без беркайчан да мондый һөҗүмнәр белән очрашмадык, һәм мондый куркынычсызлык системасы җитәрлек булмады. Әмма бу 175-нче номерлы гимназия һәм Казан проблемасы түгел – бу бөтен ил проблемасы «, – диде Мэр. Ул Россия Президенты Владимир Путинның ил хөкүмәтенә яңа нормативлар – илнең имин белем бирү учреждениеләренең бердәм стандартларын булдыру йөкләмәсен искә төшерде.

Казан, һичшиксез, яңа куркынычсызлык стандартларын формалаштыруда актив катнашырга тиеш, дип ассызыклады шәһәр Мэры. Ул билгеләп үткәнчә, якын арада Башкарма комитетның барлык структур бүлекчәләре вәкилләре белән киңәшмә оештырылачак, анда мәктәпләрдә куркынычсызлык системасын үзгәртү турындагы тәкъдимнәр тыңланачак.

«1 сентябрьгә уку йортларында яңа куркынычсызлык системасы булдырырга кирәк. Уку елы ахырына кадәр мәктәпләрдә җәмәгать тәртибен саклауның терәк пунктлары, балигъ булмаганнар эшләре буенча район бүлекчәләре хисабына сакчылар арттырылачак, дигән карар кабул иттек. Бу вахтерлар гына түгел, ә күнекмәләре булган кешеләр», – дип хәбәр итте шәһәр башлыгы. Ул шулай ук мәктәп янындагы территорияләрне полиция патруль-пост хезмәте контрольдә тотачак, дип өстәде.

«Хәзер бу ситуациядән дәресләр алу, белем бирү процессын оештыруны саклап калу мөһим», – дип өстәде шәһәр башлыгы. Ул шулай ук полициягә шәһәр мәктәпләрен миналау турындагы барлык ялган сорауларны тикшерергә кушты. «Бу вакыйгалар фонында шартлаткычлар куелган дип фейклар тараткан кешеләр булды, болар кешеләрне борчуга салды, һәм без шимбә көнне балаларны эвакуацияләүдә күнекмәләр уздык», - диде Илсур Метшин.

Искәртеп узабыз, 175-нче номерлы гимназиядәге фаҗига узган сишәмбе көнне 11 майда булды. Атыш нәтиҗәсендә 9 кеше һәлак булды – 7 бала һәм ике өлкән кеше, 23 кеше хастаханәгә озатылды. Казандагы вакыйгаларны Россия Президенты Владимир Путин да шәхсән күзәтеп барды, фаҗигадә зыян күрүчеләргә тиешле ярдәм оештыруны йөкләде.

Чыганак: kzn.ru