«Канәгатьләнмәслек бер генә әйбер бар: Идел суы чиста, ләкин коенырга ярамый»

Татарстанның экология һәм табигый  чыганаклар министры урынбасары Фаяз Шакиров бирде бу бәяләмәне.

- Футбол буенча дөнья чемпионаты кысаларында, Иделдәге һәм Казансудагы суны көн саен тикшереп торабыз. “Казан-Арена” футбол стадионы янында Казансу елгасы суын көмә-лаборатория көн саен тикшерә. Су нормада, - диде Фаяз Шакиров.

Казан шәһәре тарафыннан канализация һәм яңгыр-кар суларын чистарту корылмалары төзүдә зур эшләр башкарылганлыгын да телгә алды ул.
Сүзне фактлар белән дәлилләү өчен Экология министрлыгы журналистларга 14 июньдә көймә-лабораториядә Иделгә сәфәр дә оештырды.

- Май аеннан башлап, октябрь ахырына кадәр республика сулыкларына үзебезнең корабта чыгып анализлар ясыйбыз. Мондый көймә-лаборатория Идел буе федераль округында Татарстанда гына сакланып калды. Аппаратура суның эчке сыйфат күрсәткечләрен берничә минутта ачыкларга мөмкинлек бирә, - дип таныштырды Экология минстрлыгы үзәк лабораториясе җитәкчесе урынбасары Андрей Бодяжин.

“Казан” елга вокзалы янәшәсендә Идел елгасыннан су алынды. Белгеч-экологлар су составына көймә-лабораториядә үк анализ ясады. Идел суында заралы матдәләр табылмады.
- Кызганыч, канәгатьләнмәслек бер генә әйбер бар, - дип сагайтып алды Андрей Бодяжин һәм шунда ук елмаеп, ачыклык кертте: - Аппарат суның температурасын да күрсәтә. Иделдә 14 июньдә су температурасы 15 градус кына, әле су салкын, коенырга ярамый. Иң мөһиме - су чиста.

Автор фотолары