Казанда утсыз һәм җылытылмаган фатирда яшәүче Люция Усманова: «Гаделлек барлыгына ышанам»

Өлкән яшендә булуына карамастан, кышкы салкын көннәрне ул утсыз һәм җылытылмаган фатирда уздырырга мәҗбүр.

Люция апа пенсиягә киткәнче, 19 ел буена дәүләт фәнни-тикшеренү һәм халык хуҗалыгына исәпләү техникасын кертү буенча проект институтында эшләгән. Дөрес, хәзерге вакытта әлеге учреждение юк инде. Фатирны да шунда эшләгән елларда алганнар.

– Бу йорт төзелгәнгә февральдә 44 ел була. Беренче яши башлаучылары да без идек. Хәзерге вакытта ул заманнардагы биш-алты гаилә генә калдык инде. Күбесе вафат булды, кемнәрдер сатып китте, – ди ул.
Ә Идел буе районындагы торак-коммуналь хуҗалыгы идарәче компаниясе белән проблемалар 2004 елда башланган.

– 2003 елның декабрендә йортның подвалында су торбасы тишелде һәм шуннан көне буена су акты. Ә 2004 елның гыйнвар башында йортта яшәүчеләрнең барысының да түләү квитанцияләрендә су өчен түләргә шактый зур сумма акча килде. Күбесе түләде, кемдер шунда ук исәпләгеч куйдырды. Мин түләмәдем, чөнки ул суны без агызмаган бит, – дип аңлата Люция апа.

Шулай итеп, ул вакыттагы 300-400 сум акчага, пени өстәлә-өстәлә килеп, Люция апаның бүгенгә 41500 сум бурычы җыелган.

– Бу хәлләрнең шаһитлары хәзер миннән: «Ул чагында түләгән булсаң, бу кадәр үк проблемаларың да булмас иде», – ди. Ирем дә күптән түгел генә вафат булды. Ул да, балалар да: «Әйдә үзебез түлибез. Болай йөртеп, сине кабергә кертәләр бит», – дип әйтә килде. Ләкин мин – гомер буе гаделлек өчен көрәшкән кеше һәм һәрвакыт үземнекенә ирешә идем. Шуңа күрә түләмим. Шул акчаларны безгә ярдәм итүче адвокатларга түләсәм түлим, әмма гаделсез юл белән акча җыючылар кулына илтеп тапшырмыйм, – дип, үз сүзендә нык тора ул.
Ә тугыз ай элек Люция апаның электр энергиясен бөтенләй өзеп киткәннәр.

– 2015 елда домофонны сүндерделәр. Эшләмәсә дә, аның өчен түләү килеп торды. Инде хәзер дә ай саен һаман бурыч өстәлә тора, – дип, бер кочак кәгазь күрсәтте ул.

Яңа танышыбыз әлеге мәсьәлә буенча кая гына бармаган да кемгә генә мөрәҗәгать итмәгән. Ул еллардан соң инде идарәче компаниядә дә дүрт-биш хуҗа алышынган. Берничә тапкыр суд та булган. 2017 елдагы суд карары буенча, идарәче компания 25 июльдә фатирга электр энергиясен җибәрергә тиеш булган, ләкин ситуацияне үз якларына аударып, суд карарын игътибарсыз калдырганнар. Хәзер инде кабаттан судлашып йөриләр. Люция Усманова үзе дә Югары судка мөрәҗәгать итәргә әзерләнә.

– Минем дөреслегемне исбатлый торган документлар күп, ләкин, ни кызганыч, аларның файдасы гына юк. Улым да адвокат булып эшли. Әгәр чыннан да дөрес булмасам, ул: «Әни, син хаклы түгел», – дип әйтер иде. Балалар болай да: «Бурычны үзебез түлибез», – диләр. Мин генә каршы. Болай яшәү дә рәхәт түгел. Сәламәтлегем какшады, алҗытты. Күптән түгел генә хастаханәдән чыктым. Дарулар эчәргә туры килә. Ирем дә үлеп китте, ялгызым гына торып калдым. Җитмәсә, өйдә ремонт та ясый башлаган идек, – ди.

Ә өйдә чыннан да караңгы һәм суык. Электр булмагач, суыткыч, телевизор да да эшләми. Хәзерге вакытта фатирда иң кирәкле һәм файдалы әйбер – газ плитәсе дисәк тә, арттыру булмастыр.
– Җәй көне уңайрак иде әле. Бакчага да барып йөрдем, көннәр дә озын иде. Иң авыры менә хәзер. Кичләрен нишләргә белмим. Дусларыма барып телевизор карыйм да төн кунарга өйгә кайтам. Йоклаганда, киенеп йоклыйм. Улым гаиләсе белән аерым яши. Юыныр өчен аларга барам. Алар янына да күченәсем килми. Кызым Мәскәүдә эшли, бирегә бик еш кайта алмый, – ди хуҗабикә.

Өлкән яшьтәге апаның шундый хәлдә калуы бик кызганыч, әлбәттә.
Әлеге мәсьәләгә ачыклык кертергә теләп, без Идел буе районының торак-коммуналь хуҗалыгы идарәче компаниясе белән дә элемтәгә чыктык. Тик анда безнең сорауларга җавап бирүдән баш тарттылар. Үзен әлеге идарәче компаниянең юристы дип таныштырган Лиана Борһанова:

– Беренчедән, әлеге фатир хуҗасы бездә берничә тапкыр булды инде. Һәм әлеге мәсьәлә буенча без бернинди дә аңлатма бирмәячәкбез, чөнки фатирга сезнең бернинди дә катнашыгыз юк, – диде.

Илдар Мөхәммәтҗанов фотолары