Казаннан сызгырып чыгасы көннәребез алда әле...

Шәһәрнең тышкы төзекләндерү комитеты рәисе Игорь Куляжев “эшлекле дүшәмбе” киңәшмәсендә әйткәнчә, шушы эшләрне башкару өчен федераль һәм республика бюджетларыннан 14,3 миллиард сум бирелгән. 
 – Иң колачлы проектларның берсе Казанның Зур боҗра юлының Мидхәт Булатов урамыннан Борисково урамына кадәрге участокта яңа юл төзелеше булды, – дип таныштырды Игорь Куляжев. – Трамвай линиясе дә урнаштырылган әлеге участокта автомобильләр өчен 6 полоса билгеләнгән. Физик мөмкинлекләре чикле кешеләр мәнфәгатен кайгыртып, җәяүлеләр өчен җир өсте юл кичүе дә ясалды, анда лифт та бар. 5нче трамвай маршруты “боҗра” рәвештә тоташтырыла, ул Россиядә иң озын маршрутка әверелә. 
 Яңгырлар каты яуганда Авиатөзелеш районының үзәк өлешенә су җыела иде. Бу мәсьәлә дә уңай хәл ителгән. Максимов урамында Петр Витер урамыннан Дементьев урамына кадәрге өлештә инженерлык корылмалары үзгәртеп төзелгән, яңгыр сулары агу өчен торбалар сузылган.
 “Имин һәм сыйфатлы автомобиль юллары” федераль проекты ярдәмендә Патрис Лумумба, Тэц, Болтников, Фрунзе, Зорге, Гвардейская, 2нче Иске Аракчино урамнары юллары төзекләндерелгән. “Халык контроле”нә җибәрелгән һәм “Халык фронты” иҗтимагый хәрәкәтенең “Ватык юллар картасы” проектына эләккән хәбәрләр дә этәргеч биргән. Нәтиҗәдә, Крутовская, Автосервис, Лукин, Авангард, Гагарин, Батыршин урамнарына да юл эшчеләре килеп җиткән. 
 Казан территориясендәге бистәләрдән быел 14 бистәдә 18 юл ремонтланганган. “15нче бакча” белән “Казан тимер юл төене бакчасы” ширкәтләре файдаланучылары да “яңа юллы булдык” дип сөенгән. Игорь Куляжев әйткәнчә, Нокса елгасы аша күпер төзелеше тәмамлану алдында. Привольный бистәсенең бердәнбер күпере әлеге корылма.
Киров районында Несмелов урамында дүрт полосалы автоюл проектлау эше бара. Әлеге юл Горький шоссесына алмаш-дублер ролен башкарачак. Несмелов урамыннан Адмиралтия буасына кадәрге аралыкта җир кишәрлекләрен һәм корылмаларны кабаттан рәсмиләштерү эшләре хәл ителгән. Вознесение тракты буенча Әмәт магистраленнән Җиңү проспектына кадәрге аралыкта 6 полосалы автомобиль юлын проектлау эше дә башланган. Киләчәктә ул 10 чакрым озынлыктагы юлга әвереләчәк. Шулай ук Оренбург трактында шәһәргә керә торган өлештә ике катлы юл борылышы проектлана.