16+

Хәер бирәм дип, җинаять кылма!

Октябрь аенда Федераль куркынычсызлык хезмәте (ФСБ) хезмәткәрләре ­Россия территориясендә ялган хәйрия фонды оештырып, террорчыларга ярдәм иткән кешеләрне кулга алды.

Хәер бирәм дип, җинаять кылма!

Октябрь аенда Федераль куркынычсызлык хезмәте (ФСБ) хезмәткәрләре ­Россия территориясендә ялган хәйрия фонды оештырып, террорчыларга ярдәм иткән кешеләрне кулга алды.

Мондый «ярдәмче» фондның Кабардин-Балкар, Карачай-Черкес, Ингушетия Республикаларында, Мәскәүдә, Санкт-Петербургта, Краснодар һәм Ставрополь крайларында, Төмән өлкәсендә булуы ачыкланган. Ни кызганыч, әлеге исемлектә Татарстан да бар. 

Әлеге оешма «Телеграм» мессенджеры аша эш йөрткән һәм Россия территориясендә тыелган террорлык оешмаларын финанс яктан тәэмин итү белән шөгыльләнгән. Ялган хәйриячеләр тарафыннан 6 миллион сум акча җыелып, чит илгә күчерелгән. Ул акча Сирия Республикасындагы теракт актларын тормышка ашыру өчен тотылган дигән фараз бар.

Террорчылар оешмасы Кабардин-Балкар территориясендә оештырылган. Анда 100ләп кеше җәлеп ителгән. Сүз уңаеннан, әлеге оешмада 2005 елда Нальчикта оештырылган җинаятьтә катнашучылар да булган. Башкарылган эшләре хакында алар чит илдәге кураторларына хисап тоткан.

Нәтиҗәдә, хокук саклау органнары тарафыннан ике кеше кулга алынган. Шулай ук террорчылар инструкцияләр язылган 10 кәрәзле җайланма, 60 банк картасы, 6 мең АКШ доллары, чит илләргә акча күчерү буенча исәп-хисап документлары йолып алынган. 

Татарстанлылар да әлеге капкынга эләккән. Алардан акча мөселманнарга ярдәм итәр өчен дип җыелган. 
Республиканың Куркынычсызлык советы секретаре Рафаэль Гыйльманов бер интервьюда белдергәнчә, 2014 елдан алып Татарстан территориясендә 49 җинаять ачыкланган, шуларның 17се быел теркәлгән. Террорчылар акчаларны социаль челтәрләр аркылы да, интернет сайтлар аша да җыйган. Алар кешеләргә турыдан-туры ярдәм сорап та, мошенниклык юлы белән дә эш иткән. 

– Андый хәйрия оешмаларына сак карарга кирәк. Алар террорчыларга ярдәм итә торган яшерен миссия белән эш итә. Бу бигрәк тә Ислам төркемнәрендә киң таралган. Анда мөселманнарга ярдәм итәр өчен сәдака бирергә өндиләр, – ди Рафаэль әфәнде. 

Цифрлы технологияләр үсеше интернетның төрле җинаятьләрне ешрак кылу өчен мәйдан булуына китерде. Хокук бозучылар өчен аноним булу һәм халыкның финанс белеме түбән булу яхшы шартлар тудыра. Бу хакта «Татмедиа» акционерлык җәмгыяте генераль директоры Андрей Кузьмин белән әңгәмәдә Татарстан буенча эчке эшләр министры Артем Хохорин да сөйләгән иде. 

– Тулаем алганда, соңгы елларда җинаятьчелек интернетка китә һәм шуңа бәйле рәвештә талаулар һәм фатир талаулар азрак булды. Хәзер җинаятьчеләргә үзләрен куркыныч астына куеп башка фатирга керергә кирәкми, анда сигнализациягә эләгергә мөмкин. Аларга компьютер артына утырып, аноним эш итү кулайрак, – диде министр.

Хохорин сүзләренчә, ведомствода яңа цифрлы янауларга җитди карыйлар һәм халык белән аңлату эшләре алып баралар. Аерым алганда, Татарстанда яшәүчеләргә банк мошенникларының корбаны булмас өчен, үзләрен ничек тотарга кирәклеген аңлаталар.

– Өстәвенә, элек интернет мошенникларына өлкән яшьтәге кешеләр алданса, хәзер яшьләр дә, хәтта банк өлкәсе хезмәткәрләре дә хәйләгә эләгә. Бу чыннан да җитди тема, һәм без аңа беренче ел гына игътибар итмибез, – диде Артем Хохорин.

Шуңа да хокук саклау органнары укучыларыбызны сак һәм игътибарлы булырга өнди! Хәер бирәм дип, җинаять кыла күрмәгез!

Лилия ЛОКМАНОВА

Язмага реакция белдерегез

0

0

0

0

0

Реакция язылган инде

Комментарийлар

Мөһим

loading