Ниһаять! Россия туристлары Мисырга бара башлаячак

Диңгез курортларына хәзер Мәскәүдән Каһирә аша даими рейслар гамәлдә. Чартер рейслар әле торгызылмады. Сөйләшүләр ахырында Россия Президенты Владимир Путин Россиянең чартер рейсларына чикләүләрне бетерергә җыенуларын әйтте, аерым алганда, туристлар яратып йөргән Хургада һәм Шарм-эш-Шейхка юллар ачылачак.

Турбизнес вәкилләре фикеренчә, чартерларны оештыру һәм турларны сата башлау өчен бер ай вакыт та җитә. Бөтен өмет чартер рейсларга, халыкка кыйммәт булмаган һәм комфортлы турларны шулай гына алып була, диләр алар.

"Пирамида тур" агентлыгы вәкиле "ШК"га сөйләгәнчә, соңгы вакытта чартер рейслар турында шактый күп сөйләнә, әмма әлегә юлламалар сатылмый, чөнки Каһирәгә махсус комиссия барып, андагы куркынычсызлык мәсьәләләрен өйрәнергә тиеш. Халык Мисырны бик сагына, кайчан юлламалар алып булачак, дип сорашып торалар. Каһирәгә әлегә Мәскәү яки истанбул аша гына туры рейс белән барып була, диде безгә агентлык вәкиле.

Белгечләр кышкы сезонда Мисырга бер айга якынча 600 чартер рейсын оештырып була дигән фикердә. Бу кышка планлаштырган бөтен чартерларның 30 проценты. Аена ике меңгә якын рейс дигән сүз. Туризм агентлыгы җитәкчесенең транспорт буенча киңәшчесе Дмитрий Горин сүзләренчә, туроператорларның отельләр белән килешүләре бар. Бездән даими рейслар белән Мисырга баручылар бик аз, бердән, Каһирә аша барырга кирәк, икенчедән, кыйммәткә төшә, дигән ул. Статистика буенча, анда хәзер бер елга якынча йөз мең кеше бара. Чартер рейслары ачылса, Россиядән генә дә ике миллион турист барыр дип көтелә. Кыш көне мондый рейсларны булдыру катлаулы түгел, чөнки Мисыр белән ярыша алырлык юнәлешләр бу сезонга бик сирәк була ди.

Чартер рейсларның бәяләренә килгәндә, хәзерге вакытта Мәскәүдән Каһирәгә бару, диңгез курортына трансферны кертеп, бер кешегә 50 мең сум тора. Чартер рейслар булдырылса, аның бәясе түбәнрәк булачак, дигән өметтә турбизнес вәкилләре.

Сүз уңаеннан: 2019 елгы җәй айларында Төркиядә ял итү бәяләре 15-20 процентка артачак. Бу хәл Россия һәм Европа туристлары ихтыяҗы зур булу белән аңлатыла. Coral Travel компаниясе коммерция ди⁠ректоры Эрджюмент Юналан, без киләсе елга бәяләрнең 15-20 процентка артуын көтәбез, дигән.