Нинди бәйрәм җәй килгәнне белгертә?

Ул көнне авыл халкы оешып, тупланып, туган-тумачалары белән күрешә, аралаша. Алар кунакка йөрешә, гөслә белән сор­найда уйныйлар, бииләр, күңел ачалар. Шуның белән дә ул мари халкының еллар дәвамында килгән үз йолаларын, гореф-гадәтләрен саклап кала торган традицион бәйрәм булып тора. Элек туйларны да махсус шушы көндә үткәрергә тырышканнар.

Әлеге бәйрәм җәй килгәнен белгертә. Бәйрәмнең төп идея­се – вафат булган кешеләрне искә алу һәм йорт эшләрендә уңышларга ирешү өчен, әрвахлардан гафу сорау. Семык Пасха бәйрәменнән соң җиде атна узганнан соң башланып китә һәм якшәмбе көнне Троица бәйрәмендә тәмамлана.

Бүгенге көндә Семык республи­ка бәйрәме буларак билгеләп үтелә. 1990 елда ул республика статусын алды. Шуңа да бу бәйрәмгә килүчеләрнең саны елдан-ел арта бара. Мари Бүләргә дә күрше авыллардан гына түгел, тирә-як районнардан да кунаклар җыелды. Алар алдында республиканың төрле районнарыннан, шулай ук Киров өлкәсеннән килгән 12 фольклор ансамбль чыгыш ясады. Традициягә кергәнчә, бәйрәмдә «Марий патыр» («Мари батыры») һәм «Марий удыр» («Мари кызы») конкурслары да үткәрелде. Анда катнашучылар мари телен, гореф-гадәтләре, йолалары, тарихы һәм милли мирасын белүдә көч сынашты.

Семыкка килүчеләр мари чигү үрнәкләре белән танышты, мариларның иң попляр милли ризыгы комна мелна, безнеңчә, коймактан авыз итте. Мари халык уеннарында катнашты.
Бәйрәм бөтен кеше катнашында әйлән-бәйлән Семык флагын Менделеевск районы вәкилләренә тапшыру тантанасы белән тәмамланды.