Нурания Җамали кызларның кияүгә чыга алмау проблемасын күтәрде

“Үз гомеремдә 30дан артык фильм төшердем. “Кайда син?..” фильмында төп рольләрне Айгөл Шәкүрова, Тамчыгөл Камаева, Миләүшә Зәкиева башкарды. Кызларны кастинг аша сайлап алдык. Фильмның төп үзенчәлеге шунда: биредә танылган шәхесләр белән бергә яңа йөзләр дә катнашты. Гомумән, катнашучылар составы зур булды. Камал, Тинчурин, Кариев, Чаллы театрлары артистлары катнашты. Фильмда кызларның кияүгә чыга алмау проблемасы күтәрелә. Кешенең язмышы үз кулында, һәм әгәр тормышында нәрсә дә булса үзгәртергә тели икән, ул башта үз-үзен үзгәртергә тиеш. Фильм 1 ноябрьдән “ТНВ Планета” каналында чыгачак”, - диде Нурания Җамали.

"Кайда син?.." фильмының эчтәлеге болайрак: Хәзерге Казан. 29-30 яшьлек өч кыз үз тормышлары белән яши, әмма алар кияүдә түгел. Ни өчен шундый яшь, матур һәм уңышлы кызлар яраткан кешесен табып, гаилә корып яши алмыйлар соң? Проблема аларның үзләрендәме яки егетләрдәме? Ә бәлки хәзерге җәмгыять үз шартларын куядыр? Әллә ата-аналар эчке "мин"гә комачаулыймы? Бәлки кызларны узган мөнәсәбәтләр тотып торадыр? Партнерга куелган таләпләр артык югарымы әллә? Әмма кызлар бит шундый төрле!  Дистәләгән сорау һәм аларга бер генә җавап та юк...

Үзгәрергә карар кылгач, кызлар хобби сайлый һәм күңелләренә якын булган эш белән шөгыльләнә башлыйлар. Бию, рәсем, спортзал. Интернеттагы танышулар сайтында теркәләләр. Интернетта принцлар шактый күп һәм төрле. Алар арасында дон-жуаннар, алдакчылар да бар. Шулай ук ата-аналар һәм туганнар да, яучы рәвешенә кереп, үзләре күрергә теләгән кияүне тәкъдим итәләр. Очрашулар һәм аерылышулар, өмет һәм күңел кайтулар, мәхәббәт һәм нәфрәт – үз тормышларын үзгәртергә карар кылган кызларны менә ниләр көтә... Ялгызлык – хөкем карары түгел һәм һәркем үз бәхетен табачак, бары тирә-юньгә күз салырга гына кирәк.