Студентлар – халык арасындагы пропагандистлар

– Татарстандагы 16 югары уку йортында студентларның ришвәтчелеккә каршы комиссиясе эшли, ришвәтчелеккә каршы төрле чаралар оештырыла. Мәсәлән, «Что? Где? Антикоррупция?» Ул бер караганда уен гына, тик ришвәтчелек турында җитди уйланырга этәрә торган уен, – диде «Бирмәскә-алмаска!» («Не давать-не взять!») республиканың яшьләр өчен ришвәтчелеккә каршы программа җитәкчесе Алена Лапенкова.
Уенда булачак архитекторларның һәм төзүчеләрнең биш командасы катнашты. Студентларның ришвәтчелеккә каршы комиссиясе рәисе Рената Рамазанова әйт­кәнчә, егетләр белән кызлар уенда катнашырга бик теләп ризалык биргәннәр. Университетка хәбәр куелуга ук 40 студент шунда ук аваз бирде. 
– Ришвәтчелеккә кагылышлы мәгълүматны халыкка җиткереп тору зарур. Бу эштә студентлар яхшы пропагандистлар була ала. Студентларда мәгълүмат күп, социаль челтәрләрдә аралашасыз. Сез берничә елдан дәүләт органнарында эшли башлыйсыз. Сезнең ришвәтчелеккә тискәре мөнәсәбәттә тәрбия­ләнеп өлгерүегез әһәмиятле, – дип, командаларга фатиха бирде Татарстан Республикасы Президентының ришвәтчелеккә каршы сәясәт мәсәләләре буенча идарәсе киңәшчесе Александр Лохотской.

Казан дәүләт архитектура-төзелеш университетының тәрбия эшләре буенча проректоры Давид Кордончик сөйләгәнчә, әлеге уку йортында ришвәтчелеккә каршы пропаганда ел дәвамында алып барыла.
– Студентлар комиссиясе дә актив эшли. Төрле тематик чаралар үткәрәбез, – диде Давид Кордончик.
«Что? Где? Антикоррупция?» уенында ришвәтчелеккә караган кайбер сораулар шаян эчтәлектә иде. Тик аңа барыбер дә уйлап һәм җитди рәвештә җавап табарга кирәк. Төзелеш-архитектура университеты студентлары сынатмадылар, төгәл җаваплар бирделәр.
Бу уен татар телендә дә оештырылса, ничек әйбәт булыр иде. Тик ни кызганыч, уңай җавап ишетмәдем.
– «Что? Где? Антикоррупция?» интеллектуаль уенын татарча оештыру турында планлаштырган юк. Студентларның ришвәтчелеккә каршы комиссия­ләре рәисләре татарча белми, татарча белүчеләр юк, – диде Алена Лапенкова.
Бәлки, тагын 50 елдан татарча белә торган студентлар табылмас, ә бүген «татарча белүчеләр юк» дигән бәяләмә белән килешәсе килми. Югары уку йортларындагы татар егетләре һәм кызлары аваз салыгыз әле, зинһар!

Автор фотосы