Тарифларның артуына гадәтләндек, төшә башласа, ничекләр түзәрбез?

Газның 1 кубометры 6,25 сум булды, түләү 3 процентка артты.
Шәһәр өчен электр 1кВт сәгатькә 4,30 сум, (4,6 процент). Авыл өчен электр 1кВт сәгатькә 3,01 сум, (4,5 проөент).
Су - 1 кубометрга 28,69 сум, (6,9 процент). 
Җылылык өчен 2012,34 сум Гкал, (6,7 процент).
Көнкүреш калдыкларын чыгару - кеше саныннан 99,93 сум.

Чаллы бәхетле

Татарстанның Чаллы шәһәрендә яшәүчеләр арасында “Чаллыда су өчен түләү иң арзаны” дигән сүзләргә ышанып бетмәүчеләр бар икән.
- Республикада су өчен түләү Чаллыда, дөрестән дә, иң арзаны. Моңа техник шартлар мөмкинлек бирә. Тәтештә кыйбат, чөнки анда су 200 метр тирәнлектән алына, энергия чыгымнары зур, - диде Александр Груничев.

Хисаплагычлар ватыла күрмәсен

Татарстанның төзелеш, архитектура һәм торак-коммуналь хуҗалык министрының беренче урынбасары Алексей Фролов искәрткәнчә, түләүләр хисаплагычлар күрсәткечләренә, ягъни фактта кулланылган күләмнәргә нигезләнеп башкарыла. 
- Кышкы айларда түләүләр күбрәк булачак, әлбәттә, - диде Алексей Фролов.

Тарифларның 6,2 процентка кадәр артуы республиканың барлык муниципаль берәмлекләре өчен дә бердәй чик түгел. Мәсәлән, котельныйлары һәм инженерлык челтәрләре яңа булган торак комплексларда тарифлар да түбәнрәк була.

Татарстанда 14 муниципаль районда йортларга үзәкләштерелгән җылылык җибәрү механизмы кулланылмый. Аларда йортлар һәм фатирлар үзләрендәге җылылык казаннары белән җылытыла. Димәк, “тарифны” да үзең хәл итәсең.

Казанның “төбе” тишек

Башкаланың торак-коммуналь хуҗалык комитеты рәисе урынбасары Римма Гарипова Казанда җир асты торба үткәргечләренең 1950-1970 елларда ук салынганлыгын искә төшерде. 3 мең чакрым гомум озынлыктагы торбаларның 1,7 мең чакрым өлеше тәмам черегән. 
- Биш ел эчендә торба үткәргечләрдә 616 авария чыкты. Коммуналь челтәрләрне төзекләндереп чыгу өчен 65 миллиард сумнан артык акча кирәк, - диде Римма Гарипова.
Коммуналь челтәрләрне яңарту чыгымнары казанлылар җилкәсенә дә төшә.

Россия Федерациясе Президенты Владимир Путин рәислегендә үткәрелгән Дәүләт Советы Президиумы утырышында Татарстан Республикасы Президенты Рөстәм Миңнеханов инженерлык челтәрләрен төзекләндерү мәсьәләсен күтәргән иде.
- Дәүләт Советы Президиумы утырышында Россия Хөкүмәтенә эшләрне финанслау тәртибен булдырырга йөкләмә бирелде. Инженерлык челтәрләрен капиталь төзекләндерүгә акчалар федераль бюджеттан кире кайтармау шарты белән бирелсен иде ул, - диде Алексей Фролов.

Казанда коммуналь челтәрләрне төзекләндерү буенча инвестиция программасын раслау турында карар кабул ителү сәбәпле, 1 июльдән су һәм су бүлеп бирүгә түләүләр беркадәр арта. Алексей Фролов әйткәнчә, хисап кәгазендә “инвестиция өстәмәсе” дигән аерым графа булмый, ул инде тариф эченә кертелгән.

Ярдәмне белми калма

- Татарстанда 650 мең кеше коммуналь түләүләр башкаруда субсидия ала. Болар-сугыш һәм хезмәт ветераннары, күп балалы гаиләләр һәм башка категория гражданнар. Субсидияләр өчен 2022 елга 8,6 миллиард сум тәгаенләнде, - диде республиканың хезмәт, мәшгульлек һәм социаль яклау министры урынбасары Наталья Бутаева.

Өч балалы гаилә күп балалы гаилә санала, ләкин коммуналь хезмәтләргә субсидия алу өчен өлкән баланың яше 18 яшьтән артмаска тиеш. Субсидияләр мәсьәләсен социаль органнарда яки электрон рәвештә башкарырга була.