#Язмалар 13 июля 2022, 08:17

Татар аэробикасы нинди була?

13 июля 2022, 08:17

Бер, ике, өч, дүрт... Нәрсә саныйлар анда? Бу тавышны ишеткән һәр кеше паркның сәхнәсенә юл тотты. Өлкән яшьтәге апалар, балалар һәм яшьләр Горки-Әмәт урманында җыелып, аэробика серләренә төшенде. Казанлылар татар көйләренә яңа күнегүләр өйрәнде. Әлеге чараны Казан Мэриясе оештыра. Остаханә – паркларда һәм скверларда уза торган «Хәрәкәттә – бәрәкәт» проектының өченче дәресе.

Скопировать ссылку

Казанлыларны аэробика белән Татарстанның атказанган артисты Гөлназ Сәфәрова һәм “Сәйдәш” мәдәният үзәгенең спорт юнәлешләре җитәкчесе Ләйсән Мөхәммәтҗанова таныштырды.
– Йога – үз тәнеңне тоярга өйрәнү өчен кирәк. Гадәттә, бу әкрен, салмак хәрәкәтләр. Ә аэробикада темп һәм ритм мөһим урын ала. Мин күбрәк спортзалда күнегүләр ясарга яратам. Алардан соң тән авырта, һәр мускулны сизеп була. Су аэробикасы күңелемә аеруча якын. Салкын суда тирләмисең дә, артык каллорийларны да ягасың, - диде Гөлназ Сәфәрова.

Катнашучылар арасында танылган алып баручының фанатлары һәм тренер Ләйсән Мөхәммәтҗанованың фикердәшләре бар иде. Остаханәдә өлкән яшьтәге апалар да катнашты, аларга әби дип эндәшү килешмәс. Барлык күнегүләрне чын спортчылар кебек башкардылар. Казан апалары барысына да җитешә, сәламәт яшәү рәвешен алып бара һәм оныклар да сөя. “Ләйсән – алтынга тиң. Ул безне дөрес хәрәкәтләнергә өйрәтә. Пенсия яшенә кергәч, өйдә дүрт почмакка карап утырырга ярамый, шуңа күрә хәрәкәттән аерылмыйбыз”, - дип уртаклаша өлкән яшьтәге апалар.
– Кеше көн саен 50 минут аэробика белән шөгыльләнергә тиеш. Ул йөрәк-кан тамырлары системасы өчен файдалы. Аэробика хәтер, координация, баш мие эшчәнлеген яхшырта, шуңа өстәп күтәренке кәеф тә бүләк итә. Бу күнегүләр өчен алдан әзерләнү кирәк түгел, һәр дәрестә яңа хәрәкәтләр күрсәтелә. “Жизнелюб” проекты кысаларында өлкән яшьтәгеләргә сәламәтләндерү аэробикасы дәресләрен алып барам. Дөрес туклану – уңышның 80 процентын тәшкил иткәнен дә онытмаска кирәк, – диде Ләйсән Мөхәммәтҗанова.

Татар көйләре астында хәрәкәтләр ясау аеруча рәхәт. Остаханәгә очраклы рәвештә эләккән бәхетлеләр киләсе дәресләрне калдырырга теләми.
– Горки-Әмәт урманында чара буласы турында белмәгән идем. Кичне файдалы һәм күңелле үткәрдем. Татар җырларына кушылып җырлап, биедем. Хәрәкәтләрне бар кеше дә ясый ала, шуңа күрә үземне иркен тоттым, – диде Ләйлә Яруллина.

"Хәрәкәттә – бәрәкәт" проектының киләсе дәресендә брейк-данс биюенә өйрәтәчәкләр. Чараның кайда узуын беләсегез килсә, “Шәһри Казан” яңалыкларын күзәтеп барыгыз. Килми калмагыз!

Илгизә Галиуллина