Шәһри Казан

«Татарстанда бөтен милләтне дә татар теленә өйрәтәләр икән, дип әйтмәсәләр ярар иде!» – дип куркып утырдым»

Яңа елга аяк баскач та, күпләр узган елда ирешкән уңышларын искә төшерә. Башкалабызның 90нчы гимназиясе укытучысы Илүсә Сәлахова һәм аның укучысы Наташа Литвиненко өчен дә 2019 ел зур уңышлар китергән. Мәскәүдә узган зур ярыштан олы җиңү белән кайтканнар.

«Туган тел укытучыларының, шул исәптән рус теле укытучыларының Бөтенроссия мастер-классында» катнашканнар остаз белән шәкерт бергәләп. Бу ярыш башта ил күләмендә читтән торып уздырылган. Анда Россиянең төрле төбәкләреннән, төрле милләтләреннән 800 бала катнашкан булган. Аларның бишесе җиңүче дип табылган һәм Мәскәүгә чакырылган. Алар арасында Илүсә ханым Сәлахова һәм аның 5нче сыйныфта укучы шәкерте Наташа Литвиненко да булган. Пушкин шигырьләрен туган телдә башкару номинациясендә җиңү яулаганнар. Әлеге конкурска Наташа яраткан шагыйре Пушкинга багыш­лап үзе язган шигырен җибәргән булган. Билгеле инде, үзе дә шигъри күңелле татар теле һәм әдәбияты укытучысы Илүсә Әдип кызы ярдәме белән. Шуңа да Мәскәүгә дә икәү бергә барган алар. Мәскәүдә дә кыз, Пушкинның «Кышкы кич» шигырен рус һәм татар телләрендә башкарып, жюрины шаккатырган. «Пушкин шигырен туган телдә иң яхшы башкаручы» номинациясендә җиңүче исемен жюри, һич икеләнми, Казан кызы Наташа Литвиненкога биргән.

Наташа – рус милләтеннән. Шулай булуга да карамастан, татар телен дә бик теләп һәм күңел биреп өйрәнә. Җиңүенең төп сәбәбе дә шул. Россия Федерациясенең Федерация Советы залында бүләкләнгәндә, Пушкинга да, рус теле белән бергә татар теленә дә рәхмәт әйт­кән Наташа.

Реклама

 «Татарстанда бөтен милләтне дә татар теленә өйрәтәләр икән, дип әйтмәсәләр ярар иде!» – дип куркып утырдым» , – ди Илүсә ханым, уенын-чынын бергә кушып.

Белемнең беркемгә дә артык булганы юк шул әле. Күбрәк белгән саен, уңышлар да янәшәдә йөри. Моны бөтен илгә исбатлаган Наташа Литвиненкога һәм аның укытучысы Илүсә Сәлаховага рәхмәтнең иң олысы.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: