Яшел Үзән районында эшмәкәрләр ферма ачылуның тәүге адымнарыннан ук югары күрсәткечләр омтылалар.
Татарстанның Яшел Үзән районында «Светлое озеро» крестьян-фермер хуҗалыгы быел балык фермасының беренче чиратын ачуны планлаштыра. Бу хакта Яшел Үзән районы һәм шәһәре советларының уртак утырышында район җитәкчесе Михаил Афанасьев әйтте. Чарада Татарстан Премьер-министры Алексей Песошин һәм Татарстанның авыл хуҗалыгы һәм азык-төлек министры Марат Җәббаров катнашты.
«Балык фермасын булдыру проектының инициаторы – «Барс групп» компаниясен оештыручы Тимур Әхмәров. Ферма быел ук инде 100 тонна керкә балыгы үстерүне планлаштыра», – дип сөйләде Афанасьев.
Ул шулай ук район кулланучылар кооперативының актив эшләвен дә билгеләп үтте. Мадьяровлар гаиләсенең «Индюжина» кооперативы җитештерү әйләнешен арттырган, алар фермерларны һәм зур булмаган шәхси хуҗалыкларны кош-корт үстерүгә җәлеп итәләр.
«Быел биш яңа корпус төзелде. Планда – Кытай, Төркия һәм Иран базарларына чыгу. Гомумән, хәләл индустриядә үз урынын алу», – дип ассызыклады ул.
Яшел Үзән районының агросәнәгать комплексы 12 авыл хуҗалыгы предприятиесен, 30дан артык крестьян-фермер хуҗалыгын һәм 12,9 меңнән артык шәхси ярдәмче хуҗалыкларны үз эченә ала.
Комментарийлар