Юлда торган кешеләрне утыртасызмы?

Байтак эшләрне үз кулларым белән башкардым (сугыш чоры балалары бит без – эшләп үстек). Җиләк-җимеш бакчасы утырттым. Гаиләм, яраткан оныкларым бар бит, аларга булыр дидем. Аннары әтием Миңнетдин Әлмәндәр карт шикелле озын гомер итеп, 97гә җитеп китте якты дөньядан. Олыгайгач, күңел җиргә тартыла икән ул. Биек катлы фатирларда түгел, туфракка басып яшисе килә.

Менә мин дә шул өйгә барсам, яшәреп китәм. Бөтен аруларым, авыртуларым онытыла. “Хәрәкәттә – бәрәкәт!” – дип борынгылар белми әйтмәгәндер.
Бер генә мәшәкате бар: йортыбыз Казаннан бераз ераграк – Югары Ослан районында. Ә мин гомерем буе вертолет заводында баш конструктор булып эшләсәм дә, машина йөртмим. Яшь чакта кирәксенмәдем, хәзер инде теләсәм дә, булмыйдыр.

Шуңа да шәһәргә кайтканда юл кырыенда басып: “Энем, ал әле!” – дияргә туры килә. Машина йортүчеләрнең дә төрлесе очрый. Кайсы мәрхәмәтлесе сине күрү белән туктый, утыртып алып кайта, хәтта кирәк җиреңә үк илтеп куя. Ә кайберләре үзләрен дөнья кендегенә санап, борыннарын чөеп, күрмәс өчен кара күзлекләрен киеп, яныңнан выжылдап узып китә. Олы дию, кече дию дә юк. Бигрәк тә кабинада берүзе булганнарга ачуым чыга. Замана автомобильләренең күбесе 100дән артык ат көчле бит, моторы шуның кадәр егәрлекле. Нәрсә бу – шул бер егет 120 атка (ул бит бер көтү!) берүзе утырып барамыни? Кайда күренгән хәл ул? Аннары тагын шунысы да бар: автомобиль бензин яки газ яга һәм мин дә сулый торган һаваны да пычрата.

Шулай икән, димәк, аңа мин дә утырып йөрергә тиеш. Юкка гына аның кабинасы 4-5 кешегә исәпләнмәгән бит. Дөрес, төрле чак була – һәрвакытта да бергә төялеп йөреп тә булмый. Ул чагында инде минем шикелле олы юл буенда тилмереп торганнарны алырга кирәк. Рәхмәтнең җирдә ятканын 90 яшемә җитеп тә күргәнем юк әле. Бер рәхмәт мең бәладән коткара дип халык белми әйтмәгән инде.

Минислам Вәлиев,
Казан шәһәре.

Фото: http://pixabay.com