Боз өстендә язмышыңны сынама

Көймәнең дә көе бар

 Кече күләмле көймәләрне теркәү, аттестация узу кагыйдәләренә үзгәрешләр кертелде. Бу турыда Татарстанның кече күләмле көймәләр буенча дәүләт инспекциясе (ГИМС) сайтына мәгълүмат урнаштырылган.

Мисал өчен, хәзер аттестация узу аппарат-программа комплексы ярдәмендә башкарыла. 45 минут эчендә 35 сорауга җавап бирәсең, гамәли күнекмә имтиханы да шул ук көнне үткәрелә. Беренче мәртәбәдә уза алмасаң, кабат аттестацияне 7 көннән соң узып була.

Сәүдә үзәгеннән яки кешедән көймә сатып алсаң, аны 1 ай эчендә теркәргә кирәк. Вакытында реестрга кертмәсәң, 1500-2000 сум штраф каралган. Кече күләмле көймәләргә кагылышлы шактый эшләрне дәүләт һәм муниципаль хезмәт күрсәтүләре порталындагы шәхси кабинетың аша башкару отышлы.

200 килограммга кадәрге авырлыктагы һәм 8 киловаттка кадәрге куәтләрдәге двигательле кече күләмле көймәләрне реестрдан төшерегә кирәк. Теркәүдән төшерелмәгән очракта аларга салым салып барыла.

- Татарстанда оста куллы кешеләр тарафыннан агачтан яки тимердән ясалган көймәләр бармы, аларны теркәп буламы?-дип “Шәһри Казан” газетасы исеменнән кызыксынып сорау бирдем.

- Республикада кешеләр агачтан яки тимердән үзләре ясаган көймәләр бар. Мондый көймәләрнең техник мөмкинлекләре тикшерелә, әгәр таләпләргә туры килсәләр, теркәүгә куелалар,-дип җавап бирде Юрий Венедиктов.

Кабан күле күпер түгел

Татарстанда 2021-2022 елларда сулыкларда боз тору вакытында 1 кеше боз астына китеп үлгән, 17 кеше коткарылган.

- Сулыкларда балыкчылар җыелыша торган 99 урын күзәтчелеккә алынды. Боз калынлыгы 7 сантиметрга җитмәгән килеш тә, сулыклар өслегенә кергән 69 кеше штрафка тартылды. Боз өслеге кышкы салкыннарда да хәвефле, чөнки боз калынлыгы төрле урында төрлечә була. Язгы якта боз өстенә керү икеләтә куркыныч. Казанда Кабан күле аша боз өстеннән йөрү кыш көне дә үлем белән шаяру ул, хәзер, һава җылына төшкәч, инде Кабан күле бозыннан йөрү катгый тыела,-дип кисәтте Юрий Венедиктов.