Рөстәм Миңнеханов: «Сезнең бурыч – әлеге техниканы нәтиҗәле куллану»

Татарстан Президенты Рөстәм Миңнеханов Казан шәһәренең 5нче хастаханәсе янында Ашыгыч медицина ярдәме күрсәтү станциясе баш табибы Сергей Басановка 45 яңа "Ашыгыч ярдәм" машинасы ачкычын тапшырды. Машиналар заманча дөнья стандартлары буенча җиһазландырылган.

"Форд Транзит" маркалы машиналар экстрен медицина ярдәме күрсәтү өчен җиһазландырылган. "Сезнең бурыч - әлеге техниканы нәтиҗәле куллану, - дип мөрәҗәгать итте Татарстан Президенты чарада катнашкан Татарстан сәламәтлек саклау министры Гадел Вафинга. - Бүгенге көндә медицина ярдәме күрсәтүдә безнең гражданнардан бик күп зар бар. Бу - техника җитмәү яки аларны нәтиҗәле файдаланмау, белгечләр җитешмәү һәм эшне дөрес оештырмау белән бәйле шикаятьләр. Республика хөкүмәтенә кагылышлы мәсьәләләр, алар чишелә".

Узган ел ахырында Россия Федерациясенең Татарстан хөкүмәтенә ярдәме белән 44 берәмлек "В" класслы "Форд Транзит" һәм УАЗ маркалы санитар транспорт кайтарылды. 2017 елда Татарстанда 97 ашыгыч ярдәм күрсәтү медицина автомобиле сатып алу өчен акча бүлеп бирелгән.

"Бүген бездә бәйрәм. Үземнән һәм коллектив исеменнән заманча медицина транспорты һәм биредәге яңа җиһазлар өчен рәхмәтебезне җиткерәм, - диде Сергей Басанов. - Рөстәм Нургалиевич, без сыйфатлы һәм заманча медицина ярдәме күрсәтергә омтылачакбыз, дип ышандырасы килә".

Татар-информ