Түләүле юлда бушлай да йөреп буламы?

Ә түләүле юлда бушлай да йөреп буламы?

Транспортның кайбер категорияләре
41 маддә нигезендә түләүле юллар буенча бушлай йөрү транспорт чараларының билгеле бер категорияләре өчен каралган.
Иҗтимагый транспорт. Шәһәр автобуслары бушка йөри ала. Искәрмә: такси, маршрутка, шулай ук шәһәрара һәм халыкара автобуслар.

Ашыгыч хезмәтләр. Моңа янгын сүндерү, полиция, ашыгыч ярдәм машиналары, авария-коткару хезмәтләре һәм хәрби автомобиль инспекциясе керә.
Почта машиналары. Почта һәм акча китерүче транспорт өчен түләүле юллардан йөрү шулай ук бушлай. 

Мәктәп автобуслары. Монда мәктәп укучыларын һәм башка балалар төркемнәрен йөртүче транспорт керә. Мондый өстәмәне канунга күптән түгел генә керттеләр - 2023 елның 1 сентябрендә. Балалар мәктәпкә, спорт секцияләренә, музейларга һәм театрларга тиз барып җитә алачак.

Күп балалы гаиләләр һәм инвалидлар бушлай йөри аламы?
Күпбалалы гаиләләрнең һәм инвалидларның әлегә түләүле юллар буенча бушлай йөрү хокукы юк. Әмма 2024 елның июлендә Дәүләт Думасы күп балалы гаиләләргә йөрү өчен түләүгә чыгымнарның бер өлешен компенсацияләргә тәкъдим итте. Транспорт министрлыгы исәпләвенчә, түләү системаларының техник үзенчәлекләре аркасында күп балалы кешеләргә юлда йөрүне бушлай итү авырга туры киләчәк. Камералар гаиләнең социаль статусын билгели алмый бит. 
Яңа ел алдыннан Татарстанда ике түләүле трасса ачылды.

Казанда Вознесение тракты. Әлеге юл М-7 федераль трассасын Әмәт магистрале белән тоташтыра һәм Мамадыш трактына параллель уза. Ул халык күпләп яшәгән Совет районының юл инфраструктурасын бушату өчен төзелгән, аерым алганда, даими рәвештә бөкеләрдә торган Мамадыш трактын бушату өчен.

Вознесение трактының икенче, 7,6 км озынлыктагысы, Җиңү проспектыннан М-7 трассасына кадәргесе 11 гыйнвар төненнән түләүлегә әйләнде. Түләү бәясе транспорт чарасы категориясенә һәм тәүлекнең вакытына бәйле рәвештә үзгәреп тора. Вознесение тракты кисемтәсе буенча сәфәрнең бәясе, автомобиль категориясенә карап, 90 сумнан 350 сумга кадәр тәшкил итәчәк. Мәсәлән, I категорияле җиңел машиналар (биеклеге 2 м га кадәр)  өчен 90 сумны түләргә кирәк, ә час-пик вакытында (06:30-09:00 һәм 17:00-19:30) - 150 сум.  II категория автомобиль өчен (биеклеге 2,6 м га кадәр) түләүле участок буенча йөрү бәясе 150 сум, III категория (йөк машиналары һәм ике күчәрле һәм биеклеге 2,6 м һәм аннан да югарырак булган автобуслар) - 250 сум, ә IV категорияле (йөк машиналары һәм өч катлы, 2,6 м биегрәк булган автобуслар) 350 сум түләргә кирәк булачак.

Алексеевск – Әлмәт трассасы. Халыкара әһәмияттәге заманча дүрт полосалы магистраль, «Европа-Көнбатыш Кытай» халыкара транспорт коридорының бер өлеше. Хәзер трасса тест режимында эшли, йөрү вакытлыча бушлай. Шуннан соң юл йөрү бәясе һәр узган чакрым өчен исәпләнәчәк. Юл йөрү бәясе Алексеевскидан Әлмәткә кадәр җиңел автомобильдә 653 сум булачак. Зур йөк машиналары  йөртүчеләренә 2610 сум түләргә туры киләчәк.

Хакимият фикеренчә, билгеләнгән түләү бәяләре күпчелек автомобильчеләр өчен мөмкин булган һәм инвесторлар мәнфәгатьләрен исәпкә алган оптималь вариант булып тора. Югары Ослан тракты һәм Алексеевск – Әлмәт трассасы – уртак дәүләт-шәхси проектлар. Татарстан Республикасы транспорт һәм юл хуҗалыгы министрлыгы матбугат хезмәте вәкилләре сүзләренә караганда, яңа юллар халыкара логистик коридорларга интеграцияләү исәбенә регион икътисады үсешенә зур өлеш кертәчәк һәм хәрәкәт иминлеген арттырачак.

Лилия Яфизова